MIMANDO ang pangulo sa Armadong Kusog sa Nasud, General Jose Faustino Jr., sa tanang niyang ginsakpan nga ning panahon sa eleksyon, pabilin nga neutral ug walay dapigan nga politiko o partido sa pulitika.
Matod niya, nasayod nang daan ang mga sundalo niini ug alang niya ilang gihatag ang tibuok suporta sa mga tinugyanan sa balaud aron mapadayon ang kahusay ug kalinaw atol sa adlaw sa piniliay.
Mipagawas na siya og kamandoan sa tanan niyang personnel nga dili mosalmot sa kalihukan sa pulitika.
Masaligon siya nga sundon kini sa mga sundalo sanglit nagpabilin nga professional ang armadong kusug sa nasud kung eleksyon na ang hisgutan.
“We remain professional and we respect kung ano ang mandato namin,” matod sa hepe sa Armed Forces of the Philippines (AFP).
Padayon usab ang ilang pag bantay sa mga private armed group nga naglihok sa tibuok nasud.
Sa ilang datus, niubos na ang gidaghanon sa private armed groups sanglit adunay pag hingusog nga gihimo ang kapulisan uban sa kasundalohan.
Nagtambayayong ang militar ug ang laing law enforcement group sa pagpuhag sa mga armadong grupo nga mahimong gamiton sa nagsingabot nga piniliay.
Wala pa usab makadawat ug kasayuran ang AFP nga adunay tinguha ang mga kriminal nga molusad og kasamok atol sa sunod tuig nga eleksyon.
Una nang mibahad si President Rodrigo Duterte sa mga tawo nga gustong samokon ang eleksyon nga iyang gamiton ang militar sa pagpatuman sa kahusay ug kalinaw sa tibuok nasud.