MURAG kagahapon lang. Ang pangindahay sa Superbalita Cebu nga nagsaulog karon sa iyang ika-27 nga anibersaryo. Sa pagbalik-lantaw sukad sa tuig 1994, makapanghipaw, dili ingon kasayon ang mga kalamposan nga nakab-ot. Pulos nag-agi og daghang hagit mugna sa paspas nga kalamboan sa teknolohiya nga nagtukmod sa dakong kabag-ohan sa komunikasyon sa Internet, ang plata-porma milapad ug ang tanan gawasnon nga makamaniubra sa social media.
Sa iyang ika-27 nga kasumaran natukma ning panahon sa pandemiya sa Covid-19, busa ang tema sa kasaulogan nga “Kombati sa ika-27” haom ug makahuloganon sa padayong pagharong sa bagyo sa kasaysayan. Ang Covid-19 grabe og epekto sa kalibotan. Ekonomiya nahugno. Grabe ang pagpanaktak og trabahante o pagpanira sa estabilisemento lakip sa industriya sa mantalaan o media. Nausab ang dagan sa kinabuhi.
Ang Superbalita Cebu, una ug nag-unang inadlaw-adlaw nga mantalaang Bisaya, usa sa pipila ka mantalaan nga naningkamot sa paglawig. Nakigkombati nga di malunod sa dagkong balod nga mohapak matag adlaw uban sa pagtimon sa tagdumala, iyang maalamon nga mamahayag, ug kooperasyon sa mga kawani.
Labaw sa tanan, mapasalamaton kita sa padayong suporta sa mga bumabasa sa pisikal nga kopya ug pagsunod usab sa online nga Superbalita Cebu. Gihangop ang pagbalik sa advertisers human nabutaan sa halos libre nga pagpa-advertise sa daghang websites.Tungod niini, nadasig kita sa pagpadayon sa kombati ug pagbangon ngadto sa iyang mabulawanong panahon sa Superbalita Cebu.
Sa iyang “Pagkombati sa Ika-27,” padayong naggiya sa mantalaan ang bisyon ug kawsa sa iyang founder nga si Atty. Jesus “Sonny” Garcia, Jr. alang sa matinud-anan ug patas nga pamahayag uban sa pagpreserbar, pagpanalipod ug pagpalambo sa pinulongang Sugbuanon o Binisaya nga mapasa ug mahalon sa umaabot pang henerasyon.