Wala pay nakulit nga daog ang Los Angeles Lakers sulod sa ilang unang duha ka duwa sa regular season sa National Basketball Association (NBA).
Ang Lakers nga gipangulohan ni LeBron James wala makapugong sa kabangis sa Phoenix Suns ni Chris Paul human sila gikuniskunis, 105-115 mismo sa Staples Center.
Sa unom ka duwa sa preseason, ang Lakers wala sab makapupo og daog sulod sa unom ka duwa. Kini maoy ika-walo nilang sunodsunod nga duwa gikan sa preseason game.
Ang kapildehan sa Lakers gibituonan pa sa direyot nga kumbati nilang Dwight Howard ug Anthony Davis atol sa timeout gumikan sa frustration sa second quarter.
Unang nipilde sa Lakers ang Golden State Warriors ni Stephen Curry 114-121 didto gihapon sa balwarte sa Lakers.
Sa kadaugan sa Suns, napatik usab si Paul sa kasaysayan sa NBA human siya nikulit og 23 puntos, 14 assists nga maoy nag-istalar kaniya isip nag-inusara nga magduduwa sa NBA nga nakamugna og 20,000 points ug 10,000 assists diin ang Lakers ilang gilubong og 32 puntos sa third quarter.
Si James nipabuto og 25 puntos samtang 22 puntos, 11 rebounds ug 9 assists ang giamot ni Russell Westbrook samtang 22 puntos ug 14 rebounds ang gipaarak ni Davis sa ilang kapildehan.
Si Landry Shamet sa Suns kinsa gikan sa Brooklyn Nets niduwa bisan kon adunay angol sa iyang tiil ug nipuntos og tres samtang 21 puntos ang gipaarak ni Mikal Bridges.
Ang Lakers nga maoy champion niadtong 2019 sa NBA bubble nipaubos sa rebuilding diin tulo nalang gikan sa 15 ka mga magduduwa ang nahabilin sa ilang team samtang ang 12 pulos bag-o nga gikan sa lainlaing team nga naglakip ni Howard, Rajon Rondo, Carmelo Anthony, Trevor Ariza (injured) Wayne Ellington (injured) samtang wala sab makaduwa si Kendrick Nunn ug Talen Horton Tucker. (PAC)