Ang Brooklyn Nets nipabuto og 16-1 run aron pildehon ang Philadelphia 76ers 114-109 sa balwarte sa ilang kontra sa nagpadayong duwa sa National Basketball Association (NBA).
Si Kevin Durant nikulit sa iyang labing unang triple double karong nga season ug nirehistro og 29 puntos, 15 rebounds ug 12 assists samtang 20 puntos ang giabag ni James Harden samtang padayon nilang gikamingawan ang presensiya ni Kyrie Irving gumikan sa isyu sa bakuna batok sa Covid-19.
Ang Sixers niduwa usab nga wala ang ilang all star guard nga si Ben Simmons kansang isyu tali sa management hangtod karon wala pa masulbad ug wala pa masayri kon kanus-a mobalik ang Australian national nga posible untang magamit ang depensa ni Simmons sa paghuramentado sa opensa sa Nets sa nahabiling mga minutos sa fourth quarter.
Ang Sixers kaduha nag-airball sa ilang mga tira atol sa padayon nga paghasi sa Nets kinsa wala makasuway og tabla ug labaw hangtod sa pansak ni LaMarcus Aldridge sa nahabiling 48 segundos, 108-108 ug nilabaw dihang napasulod niya ang pakapin nga free throw.
Sa sunod nga posisyon sa bola, napasulod usab ni Durant ang iyang duha ka free throw human siya na-foul aron silyohan ang ilang pagbangon gikan sa 14 puntos nga lubong sa fourth quarter.
Si Joel Embiid ni-score og 19 puntos kinsa nakasinati og panakit sa iyang tuong tuhod atol sa duwa nila sa New Orleans samtang tag 23 puntos ang giabag nilang Tobias Harris ug Seth Curry.
Sa laing duwa sa NBA, giithan sa Charlotte Hornets ang Cleveland Cavaliers, 123-112, nihupas ang Magic sa Orlando batok New York Knicks, 96-121, gipatapsingan sa Washington Wizards ang Indiana Pacers, 135-134 ug nabali ang sungkod sa Boston Celtics batok Toronto Raptors, 83-115.
Gisungag usab sa Chicago Bulls ang New Orleans Pelicans 128-112. Wala usab magsilbi ang napagaw usab nga dugdog sa Oklahoma City batok sa Houston Rockets, 91-124, gipukan sa Denver Nuggets ang San Antonio Spurs, 102-96 ug gitangtangan og korona sa Utah Jazz ang Sacramento Kings 110-101 nga maoy naglangkob sa 10 ka duwa sa NBA kagahapon. (PAC)