Nipaarak og 22 puntos si Bobby Ray Parks aron pangulohan ang Nagoya Diamond Dolphins sa ilang pagmasaker sa Shiga Lakestars ni Kiefer Ravena, 107-68 sa Japan B. League sa Aichi Prefectural Gymnasium.
Nagpadayon og lambo ang dinuwaan ni Parks human siya nakahimo sa iyang career high ug gipugnit sa Diamond Dolphins ang ilang upat ka sunodsunod nga kadaugan human sila gilihian og tulo usab ka sunodsunod nga kapildehan para sa 2021-2022 season.
Nakaamot usab si Parks og upat ka assists ug upat ka rebounds sulod sa 26 minutos para sa Nagoya nga maoy nagputol sa upat ka sunodsunod nga kadaugan sa Lakestars.
Si Ravena, sa iyang bahin, wala maka-ugpo sa opensa ug ang maong duwa maoy labing bati sa iyang performance sa Japan diin igo lang siya nirehistro og 5 puntos pinaagi sa 1-of-13 shooting uban sa iyang duha ka rebounds, 3 ka assists ug 2 ka steals.
Ang Shiga ni Ravena adunay 5-2 nga win-lose record samtang 4-3 nga baraha ang team ni Parks. Ang kanhi pambato sa TNT Tropang Giga nga si Parks nakahimo og 10 puntos sa unang 7 ka minuto nga maoy nagtuboy sa 18-4 nga score sa unang quarter.
Sa maong duwa, wala makapamulso si Ravena diin siya nag-average og 11.2 points, 5.0 assists ug 2.3 rebounds sa nakalabay nga unom ka duwa sa Lakestars ug wala makapugong sa paghaguros sa Diamond Dolphins. (PAC)