Determinado ang TnT Tropang Giga nga tiwasan ang Magnolia Hotshots sa ilang sunod engkwentro sa 46th Philippine Cup sa Philippine Basketball Associations.
Apan ang tropa ni coach Chito Victolero sa Hotshots dili mosugot nga panamastamasan lang sila sa pwersa ni coach Chot Reyes atol sa ilang duwa karong alas 4:35 sa hapon, Oktubre 23.
Sa game 1, hugot nga depensa ang gipakita sa Tropang Giga 88-70 nga kadaugan ug nag-aso-aso nga opensa 105-93 sa game 2 ang gipahamtang sa Giga batok sa Hotshots diin nagkamuritsing ang kuponan sa San Miguel Corporation pagsagang sa ataki sa MVP Group kinsa presko pa sa ilang kadaugan sa game 7 batok sa San Miguel Beermen 97-79 nga maoy naghatod kanila sa PBA finals.
Ang super rookie sa TNT nga si Mikey Williams maoy nagtimon sa Tropang Giga diin siya nag-average og 24.5 points, 9.5 rebounds ug 5.5 assists sa finals ug nakakuha usab siya og igong suporta sa iyang mga kauban nga beterano.
“We are playing a tough team and we can’t take it lightly,” matod ni Williams.
Si Reyes nihulagway sa game two nga close game apan nahitabo lang nga nangigo ang iyang mga batos sa first half hinungdan nga nakarecover ra sila sa pagpanghudlat sa Hotshots nga gipangulohan ni Ian Sangalan ug Calvin Abueva, ang duha sa tulo nga gitawag kaniadto sa ilang panahon sa college og “Pinatubo Trio” uban ni Ronald Pascual nga wala na sa PBA.
Ang TNT adunay dako nga problema sanglit wala pay siguro kon makaduwa ba og balik karong adlawa si Kelly Williams kinsa maoy angkorahe sa ilang depensa gumikan sa back spasm nga iyang nakuha sa game 2.
Ang pambato sab sa Magnolia nga si Sangalang aduna say sama nga injury apan napugos pagduwa sa game two ug nipabuto pa og 25 puntos ug 8 rebounds apan menos ang naamot ni Abueva.
Ang laing sinaligan sa Tropang Giga nga si Roger Pogoy gusto nga ang ilang team dili mokumpyansa hangtod nga ila nang malangkat ang kampyonato nga sulod sa unom ka tuig nawala sa ilang mga kamot.
Ang lumad nga taga Sugbo kinsa wala pa makasuway og champion sa PBA niingon nga bililhon ang maong kadaugan sa torneyo sanglit tulo na siya kahigayon nga nakaduwa sa finals apan pulos pakyas.
“Sa akin sobrang magiging special ito kung makuha man namin, kasi wala pa akong championship, So first time talaga ito kung ibibigay ni Lord. Pero hindi lang ito fate, kailangan pag-trabahuhan namin,” padayag ni Pogoy kinsa maoy usa sa mga sharp shooter sa Giga.
Sa susamang conference sa niaging tuig, nakasulod usab sila sa finals batok sa Barangay Ginebra didto sa Clark bubble diin si Pogoy maoy nagpas-an sa opensa sa TNT gumikan sa pagka-angol ni Jayson Castro ug Bobby Ray Parks ug sila napukan, 1-4 sa torneyo. (PAC)