Sayo pa man tuod, pero nagpakita og dili maayong timailhan kining bag-ong hugpong sa Los Angeles Lakers.
Sa ilang unang duwa morag high school team nga giduwaduwaan ang Lakers sa Golden State Warriors nga yano ra kaayong gilubong.
Batok sa Phoenix Suns kagahapon, nagkaguliyang ang ilang bench sa second quarter sa dihang nagkalalis sila si Anthony Davis ug Dwight Howard.
Wa makapakita og away sulod sa korte pero didto na hinuon sa bench sila nag-away.
Sa dihang ni-time out ang Lakers, si Davis niduol ni Howard nga naglingkod sa bench ug sa dihang nitindog kini, giagbayan siya ni Davis.
Duna ba kahay nadungog nga wa niya nauyoni gikan ni Davis didto, morag nasuko si Howard nga nakahatag og gamayng tensiyon. Maayo na lang kay giuwang sila sa ilang mga kauban.
Hinuon, nagkauliay ra ang duha sa maayo nilang kabubut-on human nga nahusay didto sulod sa ilang dugout atol sa halftime break.
Pero ang maong hitabo nagdugang sa pagpalig-on sa mga pagduda nga wa pa gyud sila magkasinabot sa team.
Kini makita sa ilang dinuwaan nga nagkanyakanya lang. Sa ilang kapildihan sa Suns, 115-105, ang Lakers adunay 16 ka turnovers nga napahimuslan sa Suns.
Pero ang nagpatay sa Lakers og maayo mao ang fastbreaking plays sa Suns. Buot pasabot nga lupig sila sa dinaganay. Mao ni resulta sa team nga gilangkuban og mga edaran na nga mga players.
Sihag kaayo ni sa uban nilang mga kontra. Unless kon makakita sila og maayong formula o chemistry alang sa mga edaran nang mga Lakers unya molambo ang ilang pagsinabtanay, posibling makahatag pa sila og saktong labok batok sa mga batan-ong kaatbang.
Apan kon dili gani, di na lang ta maglaom. Hinuon taas pa kaayo ang kahigayonan.
* * *
Tugoti nga daklitan nako paghisgut ang kalabot sa kamatayon sa usa boxing trainer nga akong nasuod ug nahimong kumpare.
Nagbangutan karon ang komunidad sa boxing ilabi na dinhi sa Sugbo human nipanaw na sa laing kalibutan ang usa ka beterano ug inilang boxing trainer nga si Juanito “Junnie” Ablaca.
Taodtaod nga na bed ridden si Ablaca tungod sa komplikasyon sa sakit apan niadtong Miyerkules lang siya nahunosan sa kinabuhi ug nibalik na didto sa sabakan sa atong Makagagahum.
Lakip sa iyang kabanay, nahimong suod namo si Ablaca (Panoy ang among tawag kaniya) sukad pa niadtong nagtungha pa kami sa high school diha sa Concord High School sa Cabreros St., Basak San Nicolas, tungod kay managsilingan mi ug ako siyang kababata.
Samtang nagtungha, nagpabiling aktibo siya sa iyang pamoksing gikan sa pagka-amateur hangtod na sa iyang pagka professional boxer.
Usa siya sa mga sikat nga boksidor ubos sa boxing stable nga iya sa negusyanting si Lorenzo Chao Sy, tag-iya sa La Fortuna Bakery.
Bisan tuod og permi siyang mabintahaan sa gidak-on batok sa iyang mga kontra, apan ang kaidlas ug ka marunong moaway ibabaw sa ring maoy nakahatag kaniya og pangalan.
Gani tungod sa iyang talagsaong kalantip, gianggaan siya og “scientific boxer” sa sikat nga ring announcer/commentator niadtong panahona (1980s) nga si Joe Cantada.
Human sa mabungahon nga amateur boxing career, misaka pagka professional fighter si Ablaca niadtong tuig 1979.
Ang sunodsunod nga pagpamupo og kadaugan maoy naghatag kaniya og agianan nga makaaway alang sa Philippine light flyweight title batok sa banggiitan nga si Siony Carupo niadtong 1981.
Wa modap-ig niya ang suwerte niadtong higayona ug napildi kini pinaagi sa split decision.
Milatas pa og daghan mga away, apan human sa 16 ka daog, duha ka pildi ug duha ka tabla, si Ablaca nakahukom nga mosang-at na sa iyang gloves.
Apan taliwala sa iyang pagretiro, nagpabilin ang iyang gugma sa sports nga maoy iyang namat-an.
Siya ang orihinal nga nahimong head coach/trainer sa nasira na nga Ala Boxing Gym nga gipanag-iya ni Cebu boxing patron Antonio L. Aldeguer.
Nahimo usab siyang trainer sa pipila ka mga world boxing champions sama kanila ni Gerry Penalosa, Rodel Mayol, Marlon Tapales, Jomarie Gamboa ug uban pa.
Siya usab ang responsabli sa mga local fighters nga nahimong mga world title challengers sama kanila ni Edito “Ala” Villamor, Andy Tabanas ug Randy Suico.
Tungod sa iyang pagka inila sa boxing, si Ablaca naka-establisar og koneksiyon didto sa Japan diin nahimo niyang partner ang international matchmaker/promoter nga si Joe Koizumi.
Kini maoy nag-abli og gamayng pultahan sa mga Sugboanong fighter nga makaaway didto sa Japan.
Sa iyang pagtaliwan, siya nagbilin og mga handumanan nga nakulit na usab sa kasaysayan. Dako siya og natampo sa kalambuan sa natad sa pamoksing sa Sugbo.
Adiyos kanimo kumpare. Maayong pagpanaw. (jun.migallen22@gmail.com)