DIHANG gipangutana og usa ka pari si Ranie Cañeda, 35, kon unsa ang iyang pangayuon sa Ginuo, dali siya nitubag og anak.
Ug ang maong tubag, natuman.
Usa ka batang babaye ang gipakatawo sa asawa ni Ranie nga si Karen Padin-Cañeda niadtong Oktubre 16, 2017.
Lima ka tuig nga gipaabot sa magtiayong Cañeda ang bata nga ginganlan nila og Mary Ran Kathreen “Ranran” Cañeda. Kini natawo sa St. Vincent General Hospital ug nitimbang og lima ka libras
Sila si Ranie ug Karen nakasal niadtong Hunyo 16, 2012 sa Sto. Tomas de Villanueva Parish (STVP), Barangay Poblacion Pardo, siyudad sa Sugbo.
Sa kagustohan nga makabaton na sila og anak, bisan unsa nga medikal nga paagi ang ilang gisuwayan aron momabdos si Karen.
Nisuway og tomar og fertility pills ang 29 anyos nga inahan, daghan og bakuna ang giindyek sa iyang lawas aron lang siya magsabak.
Ug kining tanan nigasto sila og dakong kantidad sa salapi aron matuman ang ilang pangandoy nga makaanak.
Nidangop usab sila sa mga santos sama ni San Gerard, ang santos alang sa gusto nga magmabdos nga ang kapistahan saulogon sa Oktubre 15 o usa ka adlaw sa dili pa ang kasumaran sa adlaw nga natawhan ni Ranran.
Si Karen niasoy nga dihang nagpahigayon og novena mass ang ilang dapit sa Sitio Cabancalan II, Barangay Bulacao, ning dakbayan, alang sa kapistahan sa Señor Sto. Niño, si Padre Irwin Pilario sa STVP, nangutana ni Ranie kon unsa ang pangayuon niini sa Ginuo ug yanong gitubag sa uwahi nga anak.
“Nahibung ko sa kadaghan namo nanimba didto, unya naa pa gyud mi sa luyo naglingkod, siya gyud ang gitawag ni Father Irwin ug gipangutana,” saysay ni Karen.
Delikado ang iyang kahimtang dihang nagmabdos kay gawas nga gipa-bed rest kini sud sa tulo ka buwan o gikan sa ikaunom ka semana sukad namabdos hangtod sa ika-16 nga semana, nidaut usab kini ug niusos ang timbang sa lawas.
“Lipay kaayo ko, nakahilak ko pagkahibawo nako nga buntis na gyud ko. Kay kato nga time, wa nami nag-expect, di nami ganahan ma-pressure sa akong bana nga makaanak jud mi,” dugang sugilon niini.
Niadtong Oktubre 16, gisaulog nila ang unang birthday ni Ranran pinaagi sa Children’s Party nga may tema nga mga prinsesa sa Walt Disney nga gipahigayon sa Garces Royal Garden sa siyudad sa Talisay. SCG