Kon bag-o ka pa sa biseklita, ayaw og kompyansa og kuyog sa mga beterano nang manikad kay usa o duha ana nila kabuangan ka, dad-on ka og lisod nga mga lugar, sama sa ka layo ug katungason. Mao na ang among gitawag og “scam.” Kanang nailad ka ba kay gisultihan kang mas duol ug di tungason ang inyong rota. Apan opposite diay kaayo.
Pareho adtong ka usa nga gidala ko sa akong mga kauban ngadto sa Brgy. Lusaran nga wa pa nako mataak sukad. Pagpadulong pa lang, kutas na kaayo ang tungas gikan sa Barangay Cambinocot. Lami na kaayo ang akong feeling hinuon pag-abot sa ibabaw.
Ang wa nako mahibaw-i nga lami nga dulhog, ang tungas padung sa Kang-atis maoy gahuwat nako. Hinuon, kon naanad ka na sa long ride, kaya ra ka kaayo nimo nga subidahon. Apan niadtong panahona, weekend rider na man lang ko. Kanang maka ride sagad Sabado ug Dominggo ra.
Kon gusto ka nga ma improve og dali, batasana ang pagsikad kada adlaw. But kinahanglan ka sab nga mosakripisyo sa imong mga kalihukan sa gabii. No Netflix ug uban pa aron makamata ka og sayo aron duna ka pay oras nga makaandam sa imong trabaho.
Ang mga eksperto sa panglawas nagsulti nga gikinahanglan ang ehersisyo mga 30 minutos ngadto sa usa ka oras matag adlaw kon gusto ka nga dunay resulta nga dali. Mao sab ni ang akong gibuhat kaniadto.
INSOMNIA
Di lang kay ako ang naa aning sakita. Ang nakapait kay dihang nagsige ko og bike bisan sa gabii, nisamot na hinuon. Matod sa akong higalang doktor, kon insominiac ang tawo, mas maayo kon sa buntag ang pag exercise, instead sa gabii. Gani, bisan ang pagkaon og late na sa gabii, sagad mo trigger sa insomnia.
Matod niya nga mas maayo nga anaron ang lawas sa buntag nga momata og sayo ug mag exercise kay dako og matabang sa insomnia. Mas maayo gani nga mabulad usab sa adlaw kay usa sab ni sa makatabang sa pagkontra sa insomnia.
Nindot usab ang imong ma feel kon ikaw mag exercise sayo sa buntag. Gaan ang imong paminaw ug energetic ka. Lahi kaayo kon sa gabii mag exercise.
Apan depende usab ni kay duna may uban nga maayo ang epekto nila sa pag-exercise gabii, apan sagad ani nila di insomniac.
URBAN RIDE
Ang usa nako ka higala nagtukod og folding bike group sa Manila nga wa nako dahuma nga modako og maayo. Gikan sa pipila lang, karon naa na kini mga miyembro sa daghang kasuokan sa Manila. Makakita ko sa lainlaing grupo sa rides nga grabeha na ka lagyo. Daghan sa brands high end, sama sa Dahon, Birdy, Brompton, Tern ug uban pa. Ang presyo ani motumbas sa mga mountain bike brand nga aluminum hardtail nga hi-end brands pud.
Sa urban riding, sa ako nang giingon, mao ni ang best bike labina sa cornering ug pagmaneubra sa mga tight spaces sa traffic. Nindot usab ni kay ma fold, mahimo rang madala sa sulod sa opisina.
Nganong mag mountain bike ka man sa siyudad? Suwayi ang foldie, makalingaw baya kaayo.Labina kon pamilya ang manikad sa karsada.