Mongaya: Social distancing sa mga sakyanan

Nahimong kataw-anan ang pag-insister sa Emergency Operations Center (EOC) sa Syudad sa Sugbo nga 20 ka sakyanan lang gyud ang angay mosalmot sa mga political motorcade. Matod pa, tungod kuno kini sa social distancing.

Akong nasabtan sa mga batid sa EOC, kuyaw magtinakdanay sa COVID-19 kon magsikit ang daghan kaayong mga sakyanan. Luwas ra kon 20 ra ka buok.

Ambot nganong daw nisanay ang mga ingon niining mga lagda. Mao nga nipaguwa og pamahayag ang EOC nga 20 lang gyud ang ningsalmot sa motorcade sa mga tigsuporta ni Vice President Leni Robredo sa miaging duha na ka Sabado. Sayop kuno kadtong balita nga miabot og 200 ka mga sakyanan.

Sa miaging Sabado, dunay laing motorcade nga gipahigayon ang mga tigsuporta ni Leni. Mas daghan kini sila. Ug sa ilang pagsuway nga mabuak-buak ang ilang motorcade aron lang mosunod sa lagda sa EOC, nagkayagaw na hinuon ang ilang mga ruta.

Human sa motorcade, naay ubay-ubay nga nag-abot sa Plaza Independencia ug nagtapok sa bakanteng lote gawas sa Fort San Pedro.

Nagsud-ong man ko kanila ug klaro man nga wala sila magsikit. Apan dunay usa ka patrol car nga ni-parking sa ilang duol ug nanaog ang mga polis. Dayon namadlong kini nga dili daw magtapok kay sukwahi sa lagda sa social distancing.

Akong nadunggan ang usa sa mga polis ni-istorya sa iyang kauban nga ingnon pa lang sa media nga wala sila mamadlong. Wa siya makahibawo nga naa ko sa duol ug nakadungog kaniya. Nagbadlong-badlong lang diay kuno. Apan sa akong pag-aninaw sa nahitabo, murag nabalaka sila nga nagpundok ang mga nag-pink diha gawas sa Fort San Pedro.

PRO-SARA

Laing motorcade nga gipahigayon kagahapon kay gipahigayon sa mga tigsuporta ni Davao City Mayor Inday Sara Duterte-Carpio. Wa na ko makakita kanila kay sa akong nasabtan mosayo sila ug diri ra man ko sa Plaza Independencia.

Gitakda silang mag-abot sa City Hall sa Talisay kay duna silay gipahigayon nga press conference. Matod pa, plano nila nga awhagon ang mayor sa Davao City nga anak ni Presidente Rodrigo Duterte nga si Inday Sara sa pagdagan gyud.

Samtang nahitabo kini, nia sab sa Sugbo si Inday Sara nga nakigkita sa lain-laing mga politiko sa Sugbo sama ni acting Mayor Mike Rama sa Syudad sa Sugbo ug Mayor Samsam Gullas ug asawa nga si Rhea.

Kahinumdoman, si Inday Sara ang nagkasal nilang duhang Samsam ug Rhea didto sa Syudad sa Davao.

Matod pa, nia si Inday Sara dili tungod sa politika. Motambong siya sa inagurasyon sa usa ka pribadong pantalan diha sa lungsod sa Liloan karong adlawa.

Siguradong magpundok ang mga Garcia pinangulohan ni Gob. Gwen Garcia sa maong kalihokan. Si Christina, ang anak sa gobernadora, mao man ang mayor sa lungsod. Of course, naa si Cong. Duke Frasco. Pasuya sa kontra gud nga mao silang kanhi kalihim sa turismo Ace Durano, kanhi kongresista Red Durano, bise mayor Mix Durano, ug Mayor Nito Durano.

Bongbong

Ang akong giatangan kagahapon mao ang istorya kabahin sa resulta sa giingong miting nilang Inday Sara ug kanhi senador Bongbong Marcos, ang anak sa diktador. Mao man gud kana ang akong nadunggan sa sayo pa.

Giingong adto kuno sa usa ka balay sa Maria Luisa ang miting apan mga sayo sa gabii, atong nadunggan nga naa ra si Sara sa Adnama building ni Ding Borja. Naa pa daw kunoy laing tigum nga gilakaw si Bongbong.

Atong nasayran nga daghan sa mga nanambong sa pro-Sara nga motorcade interesado makahibawo kon mag-Sara-BBM ba sila o BBM-Sara.

Hinuon, moatang na lang ko sa Nobiyembre 15, ang deadline sa substitution. Anhi nato mabal-an kon unsa gyud ang final nga line-up sa mga kandidato. (DM nako sa @anol_cebu)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph