Gipasidan-an ni Philippine National Police (PNP) Chief Guillermo Eleazar ang publiko batok sa mga social media page nga nagtanyag og passport appointments nga may bayad.
Kay ang Department of Foreign Affairs niklaro nga ang appointment slots alang sa tanang consular services libre.
Sa usa ka anunsyo sa website sa PNP, si Eleazar miingon nga si Department of Foreign Affairs (DFA) Undersecretary Brigido Dulay nangayo og tabang sa PNP ug sa National Bureau of Investigation (NBI) aron sa paggukod sa mga nagpaluyo sa mga Facebook page ug mga grupo nga nagtanyag og paspas nga proseso sa appointment sa pasaporte sa mga aplikante.
Si Eleazar niingon nga iya nang gitahasan ang Anti-Cybercrime Group sa PNP sa pagsusi sa maong social media pages aron madakpan ang mga sad-an.
“Hindi natin papayagan na pagkakitaan pa ang ating mga kababayan lalo na ang mga OFWs dahil sa hirap ng buhay ngayon na dulot ng hinaharap nating pandemya,” matod niya.
Gihangyo usab sa DFA ang higante sa social media nga Facebook nga “identify and take down these accounts to prevent the public from getting swindled into paying for a service that is completely free of charge,” ingon sa pahibalo.
Gihangyo usab sa heneral sa kapulisan ang publiko nga dili mogamit sa maong mga serbisyo sa social media tungod kay makadasig lang kini sa mga mangingilad sa pagpahimulos sa mga Filipino.
Gihangyo hinuon niya ang publiko nga i-report ang maong mga ilegal nga kalihukan.
Sa bahin sa mga biktima sa scam, iyang gitambagan sila nga ipasaka ang ilang mga reklamo pinaagi sa mga plataporma sa E-Sumbong sa PNP. (CTL gikan sa PR)