SUPERBALITA CEBU

Cafgu ‘mipatay’ sa silingan, nasikop sa kapulisan

NASIKOP: Si Ranil Villanueva, sakop sa Cafgu sa Dakbayan sa Danao, nasikop sulod sa detachment diin siya nag-duty niadtong Biyernes sa gabii human giingong gipatay ang iyang silingan. (Tampo sa Danao Police)

Nadakpan sa kapulisan sa Dakbayan sa Danao sa Biyernes sa alas 6 sa gabii, Oktubre 22, 2021 ang usa ka sakop sa civilian auxiliary nga suspek sa pagpatay sa iyang silingan.

Ang suspek giilang si Ranil Villanueva, 27, ulitawo, sakop sa Citizens Armed Forces Geographical Unit (CAFGU), taga Sitio Colo, Brgy. Cahumayan, dakbayan sa Danao, nadakpan sa follow up operation sa detachment niini sa Brgy. Pili, dakbayan sa Danao.

Ang biktima giilang si Glecirio Pintor, 51, minyo, mag-uuma, caretaker sa yuta NGA gipuy-an sa mga Villanueva.

Si Police Lt. Col. Ardeolito Cabagnot, hepe sa Danao Police Station nga nahinabi sa Superbalita Cebu, nagkanayon nga sila si Pintor ug Villanueva dugay nang nagkabangi.

Si Cabagnot nibutyag nga Huwebes sa alas 10:00 sa buntag, Oktubre 21, 2021, giingong gibaharan ni Villanueva si Pintor.

Unya pagka alas 5:30 sa hapon Huwebes, giingong gipusil ni Villanueva si Pintor hinungdan sa kamatayon niini.

Ang anak ni Pintor ug mga silingan positibong niila kang Villanueva, labi na sa motorsiklo nga gigamit pagsibat.

Ang bangi gumikan sa mga tinanom ni Pintor nga utanon ug mga prutas nga gipanghilabtan ni Villanueva.

Nasuko sab si Villanueva kay gi-prankahan ni Pintor nga mas maayong mobalhin nalang og puyo gikan sa gibantayan niyang luna.

Si Cabagnot midugang nga sa wala pa sab mahitabo ang kremin, alas 4:00 sa hapon sa samang adlaw, ang inahan ni Villanueva nagpa blotter sa Danao City police sa ilang reklamo batok kang Pintor.

Human niadto nanghakot sab sila sa ilang mga butang.

Wala magdugay, gipusil si Pintor ni Villanueva samtang diha sa tugkaran sa ilang balay.

Samad sa ulo ug sa nagkadaiyang parte sa lawas ang naangkon ni Pintor hinungdan sa iyang kamatayon.

Dunay unom ka mga kabhang sa kalibre .45 nga pistola ang narekuber sa kapulisan sa crime scene.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!