Si Davao City Mayor Sara Duterte-Carpio niadtong Sabado, Oktubre 23, 2021, nakigtagbo kang presidential aspirant Ferdinand “Bongbong” Marcos Jr. ug Senador Imee Marcos sa Sugbo, nga mipainit og maayo sa mga hungihong nga siya modagan og nasudnong posisyon sa 2022 elections.
Sa managlahing Facebook posts, nag-post si Duterte-Carpio og mga litrato nga nagpamatuod nga nakigtagbo siya sa managsuong Marcos sa Sabado.
“Confirmed po na nagkita kami ngayon lang ni Presidential aspirant at former Senator BBM sa masayang pagdiriwang ng birthday ni Cong. Yedda, maybahay ni House Majority Leader Martin Romualdez sa Cebu,” caption niya sa usa sa iyang mga post.
Sa laing post, gi-post usab ni Duterte-Carpio ang mga litrato sa iyang pagpakigkita kang Imee Marcos.
“Manang Imee kumusta ka na? Maraming salamat sa pagbisita at suporta palagi,” caption niya sa maong post.
Si Cebu City mayoral aspirant ug Acting Mayor Michael Rama nakigtagbo usab sa Presidential daughter niadtong Sabado sa buntag.
“Maayong buntag! Early meeting po at kumustahan with Cebu City Vice Mayor Mike Rama! Nakausap din natin si Atty. Bruce Rivera. Daghang salamat po sa suporta!” siya miingon sa usa ka post.
Wala gibutyag ni Duterte-Carpio ang nahisgutan atol sa iyang pakigtagbo sa mga Marcos ug Rama.
Kaniadtong Biyernes, si Duterte-Carpio nakapakurat sa iyang mga supporter sa dihang nag-viral online ang mga litrato niya nga nagsul-ob og green nga hoodie nga adunay “Sara All 2022” nga nabutang niini.
Ang Sara All Philippines 2022 maoy usa sa mga grupo nga nag-awhag kaniya nga modagan pagka presidente sa eleksyon.
“Magandang gabi sa inyong lahat. Confirmed po ang aking pagbisita sa Cebu. Kausap ko ngayon ang aking pinsan na si Cebu 5th District Board Member Red Duterte. Maraming salamat,” matod niya sa usa ka post.
Una nang gideklarar sa mayor nga dili siya modagan alang sa labing taas nga posisyon sa eleksyon bisan pa sa mga panawagan sa iyang mga supporter.
Si Duterte-Carpio modagan na hinuon isip reelectionist Davao City mayor. Ubos siya sa Hugpong ng Pagbabago partylist.
Si Duterte-Carpio nagpakahilom sa posibilidad nga adunay “switching” sa mga nominasyon sa pagkapresidente, susama sa nahitabo sa iyang amahan nga si Presidente Rodrigo Duterte niadtong 2016 elections.
Ang PDP-Laban, ang partido politikal sa Presidente, mibutang kang Senador Ronald "Bato" dela Rosa isip standard-bearer sa 2022 nga eleksyon.
Si Presidential Spokesperson Harry Roque, niingon niadtong Oktubre 8 nga si Duterte-Carpio dili mahimong substitute candidate ni Dela Rosa. (JGS)