PADAYONG gisusi karon sa Barangay Council sa New Bulatukan, Makilala, Cotabato Province ang giingong sunod-sunod nga pagpamatay ug pagkawala sa mga binuhing iro sa dapit.
Matud ni Barangay New Bulatukan Kapitan Heracleo Pepito nga brutal nga gipamatay ang mga iro sa ilang dapit.
Gihulagway nga gikaon ang mga "laman-loob" sa mga iro, apil na ang utok nga daw buhat sa aswang o mangtas nga hayop.
Ang walo ka mga iro mismo ni Pepito ang biktima sa brutal nga pagpatay.
Gawas sa mga gipamatay, daghan sab nga mga iro ang nangawagtang sa nahisgutang barangay.
Dili pa matumbok sa mga opisyal sa barangay kon aswang o mangtas nga hayop ang naghimo niini, apan nagpadayon ang ilang imbestigasyon aron nga matumbok ang tinuod nga naglimin nga misteryo niini.
Sa kasamtangan, nagpatabang na ang barangay sa kapulisan sa Makilala Municipal Police Station ug milusad na og pagronda ang mga sakop sa Barangay Peacekeeping Action Team aron nga matumbok kon kinsa ang responsable sa pagpanglapa ug pagkawagtang sa mga iro sa ilang dapit.