TRENDING sa social media ang nahitabo nga komusyon sa duha ka higanteng player sa Los Angeles Lakers nga si Dwight Howard ug Anthony Davis diin nagkapisikalay ang duha sa ilang bench atol sa timeout.
Mismong ang Laker legend nga si Earvin “Magic” Johnson mipadayag nga wala kini makauyon sa nahitabo sa Lakers.
Sa iyang post sa Twitter, misuwat si Johnson nga sulod sa 42 ka tuig niya sa Lakers organization, wala pa kini makakita og ingon ato nga panghitabo diin atol mismo sa duwa diriyot magkasukmagay ang Lakers teammate.
Atol sa timeout sa duwa batok Los Angeles Lakers ug Phoenix Suns, nagkalalis si Howard ug Davis nga miresulta sa tinukmoray sa duha og posible mas grabe pa kon wala kini uwanga sa ilang mga teammates.
Usa ang Lakers sa mga inilog karon nga season tungod sa ilang pag-assemble sa super team nga naglakip nila Lebron James, Anthony Davis, Russel Westbrook, Carmelo Anthony, Dwight Howard, Deandre Jordan ug Rajon Rondo.
Lig-on pud ang bench sa Lakers kay anaa man sila Trevor Ariza, Kent Bazemore, Avery Bradley, Wayne Ellington ug Kendrick Nunn.
Apan bisan paman niini, ang Lakers wa pa gyud makadaog sulod sa ilang duha ka duwa sa regular season.
Matod pa sa usa ka netizen nga mi-comment sa post ni Johnson, mao kini ang mahitabo kon sobra kadaghang stars ug personalities sa bench. Dugang pa niini nga di gyud makuha sa Lakers ang chemistry kon padayon ang attitude nga alpha-male sa players.
Si netizen Kim Smith miingon nga mao kini ang mahitabo kon mag-assemble og team nga murag pang Marvel Avengers nga salida.
Naa puy netizen nga mibasol kang Howard tungod sa negative attitude daw niini ug sa kakuwang sa motibasyon.
Si Johnson usa sa All-Time Lakers great. Midaog kini og lima ka titulo niadtong dekada 80 sa wa pa kini mobiya sa liga tungod sa sakit nga HIV.
Sa iyang playing career, si Johnson nahimong 5-time NBA champion, 3-time NBA Finals MVP, 3-time regular season MVP, 12-time NBA All-Star, Rookie of the Year, Olympic gold medalist ug nalakip pud siya sa 50 Greatest Players in NBA History.
Mitapos si Johnson sa iyang career nga adunay 17,707 puntos, 6,559 rebounds, ug 10,141 assists. (RSC)