GIPAHIBALO sa lokal nga kagamhanan sa dakbayan sa Ormoc ang publiko nga sirado ang mga sementeryo gikan Oktubre 29 hangtod sa Nobiyembre 2, 2021.
Matod sa Ormoc Kalagkalag Task Force, gisunod lang nila ang kamanduan gikan sa Department of Interior and Local Government (DILG) ug National Inter-Agency Task Force (NIATF).
Abli lang ang mga sementeryo sa Ormoc gikan Oktubre 24 hangtud 28 ug Nobiyembre 3 hangtud 5.
Ablihan ang sementeryo sugod alas 5 sa buntag hangtud alas 6 gabii ug ginadili ang pagdala sa mga hinagiban, drugas, sound system, ilimnon makahubog ug gamit pang sugal.
Ang tanan nga mobisita gihangyo nga magsul-ob og face mask ug magdala og QR code.
Ang mga senior citizen nag-edad og 65 pataas nga bakunado pwede ra makasulod basta dala ang ilang vaccination card ug QR code.
Ang mga bata nag-edad og 15 anyos ug paubos dili pwede makasulod.
Kon dunay lubong gikan sa Oktubre 29 hangtud sa Nobiyembre 2, mahimo ra makasulod apan limitado lang gihapon ang ihap sa mohatud aron matuman ang social distancing.
CAN-ADIENG CEMETERY
Dunay one-side parking sa motorsiklo sa wala nga bahin dayon og saka. Ang mga nagbaktas adto sa gawas sa karsada likod sa Can-adieng Elementary School.
Ang parking area sa mga four-wheel nahimutang sa ibabaw duol sa Ormoc Memorial Garden.
Ang mga nagsakyanan mahimo ra mogawas sa karsada padung sa Alta Vista ug Bantigue.
VALENCIA CEMETERY
Sa Valencia, ang entrance ug sa Cagbuhangin, ang paggawas.
Dunay parking area sulod sa sementeryo. (JKDP)