ANG solo artist nga lumad nga taga-Lungsod sa Pinamungajan, Lalawigan Sugbo nga si Rodel Gequilan, usa ka pianist ug mang-aawit, tungod sa maong talento mao sab kini ang naghatag niya og trabaho isip singer sa cruise ship.
Apan gumikan sa pandemiya dala sa coronavirus disease (Covid-19) kasamtangan nga na-undang siya sa pagpanukar sa cruise ship ug mipauli sa Pinamungajan.
“Nanikaysikay nalang ko diris probinsya para maka survive sa pandemic nga atong giatubang karon, then gig og ginagmay mga private nga function lang kay bawal pa man ang mga resto bars ug mga events ron,” matod pa ni Rodel.
Usa usab ka song writer ug arranger ingon man voice coach si Rodel.
Nagtanyag siya og home service alang niadtong mga interesado nga maoy iyang gikalingawan samtang nagpaabot og tawag gikan sa iyang kompaniya nga makabalik og panakay sa cruise ship isip entertainer.
Adunay na-compose nga awit si Rodel ang ‘Hain Ka Na’ nga mahitungod sa usa ka tawo nga mibubo sa iyang pagmahal apan ingon sa wa kini hatagi og bili sa gikarelasyon.
“Akong gikuha ang inspirasyon aning kantaha base sa akong experienced ug sayod ko nga daghan sad nga naka experience ani,” paghulagway sa composer. (FVQ)