GIKAN sa duha ka oras nga biyahe gikan sa lungsod sa Liloan paingon sa dakbayan sa Sugbo agi sa national highway o sa North Coastal Road, mamahimo na unya kining 45 minutos sakay sa Tooline Seabus nga manukad sa Pier 88.
Lakip sa rota sa naasoy nga seabus mao ang dakbayan sa Lapu-Lapu, isla sa Mactan tungod sa daghan usab nga pasahero nga sagad mga trabahante sa mga kompaniya sulod sa Mactan Economic Zone (MEZ).
Giinagurahan na sa lokal nga kagamhanan sa Liloan ug sa mga opisyal sa Topline Group of Companies ang Pier 88 inubanan sa pagpa-blessing sa Topline Seabus, niadtong Dominggo, Oktubre 24, 2021.
Ang Pier 88, usa ka public-private partnership sa Liloan ug sa Topline, diin magtukod og port nga adunay marentahan sa mga restaurant o uban pang establisemento nahiluna sa luyo sa simbahan sa Liloan, Cebu.
Sa pagkakaron, nagpadayon ang nabiling trabahon sa pagtapos sa Pier 88 busa wala pa gibutyag ang pletihan sa rota ug kanus-a ang tukma nga petsa pagsugod biyahe sa seabus.
Ni-invest ang Topline og P1 bilyunes aron mahimo kini ang maong proyekto sa katuyoan nga mas madali na ang pagbiyahe sa mga residente sa amihanan sa Sugbo ngadto sa lainlaing mga lugar sa Sugbo.
Sa pakigpulong ni Cebu Provincial Governor Gwen Garcia, niingon siya nga ang maong proyekto makatabang sa sobra sa 10,000 ka mga pasahero nga permanenting magbiyahe gikan sa Liloan paingon sa mainland Cebu aron mas mapadali ang ilang pagbiyahe ug dili na mahasol sa pagsubay sa hinay nga dagan sa trapiko.
Ang Topline Seabus makaakomodar og 150 ka mga pasahero kada biyahe diin ang rota gikan sa Liloan paingon sa Cebu-Mactan ug sa siyudad sa Sugbo ug vice versa.
Gilaraw nga mag dry run sa operation karong Disyembre ug full operation na kini sa first quarter sa 2022.
Ang terminal sab sa maong proyekto dili ang naandang terminal tungod aduna kini mga restaurant nga adunay al fresco dining o open air diin makapahuway ang mga pasahero samtang magpaabot sa ilang biyahe .
Ang susamang sakyanan sa kadagatan unang gipatuman tali sa dakbayan sa Naga ug dakbayan sa Sugbo ngadto sa Mactan gilusad niadtong Oktubre 28, 2019, sa MCE Shipping Lines.
Ang MV Nicole Express, usa ka sea jeepney, gibanabana nga niadto nga masakyan sa dili moubos sa 400 ka mga pasahero matag adlaw tali sa Naga City wharf ug Cebu City Pier 1.
Tungod sa pandemiya sa Covid-19, nahunong ang iyang operasyon human sa pagminos sa pasahero ug pag-estrikto sa kuwarentina. Wala pa usab masayri kon mobalik ning pagluag sa protocol sa Covid-19.(KFD/RRM)