MISIDLAK ang Filipino gymnast Carlos Yulo human nasakmit ang gold medal sa 50th FIG Artistic Gymnastics World Championships didto sa Kitakyushu, Japan kagahapon.
Gidaog ni Yulo ang vault final aron mahimong world champion pinaagi sa average iskor nga 14.916. Ang 21-anyos nga Olympian mitali og 15.033 nga iskor sa una niyang jump og 14.916 sa ikaduhang jump.
Pipila lang ka oras human siya midaog og gold medal, gisundan ni Yulo og silver medal sa men’s parallel bar final.
Si Yulo maoy unang Filipino gymnast nga midaog og multiple world championship medals sa usa lang ka torneyo. Unang nahimong world champion si Yulo niadtong tuig 2019 diin midaog siya’g gold medal sa men’s floor exercise didto sa Germany. (RSC)