PINASIDUNGGANG dinapit si Davao City Mayor Sara Duterte-Carpio sa pagsubo sa Pier 88 sa lungsod sa Liloan kagahapon, Oktubre 24, ug ang mga tigbalita padayong interesado sa pagpangutana kaniya bahin sa ilang nasabotan sa tigom tali ni kanhi Senador Bongbong Marcos (BBM) niadtong Sabado, Oktubre 23.
Apan padayong tak-om ang baba ni Sara sa pagbutyag sa detalye sa ilang panagtagbo ni BBM.
“I cannot comment on that but you can ask him since he is the one who is a candidate for a national position,” matod ni Sara, kinsa kanunay giduso sa mga dumadapig nga mokandidato sa pagka presidente hulip sa iyang amahan nga si Presidente Rodrigo Duterte.
Giklaro ni Sara nga wala siyay plano nga modagan sa pagka presidente sa 2022 local ug national elections.
Unang nihukom si Sara nga dili mokandidato dihang ang iyang amahan nidawat sa pagduso sa PDP-Laban nga modagan sa pagka bise presidente pares ni Sara.
Apan sa unang adlaw sa pag-file sa certificate of candidacy (COC), si Duterte nisibog ug iyang giendurso si Sen. Bong Go. Samtang si Sara ni-file sa pagpasubli sa pagka mayor sa Davao. (KFD, RRM)