DUHA ka unggoy nag-estoryahay bahin sa Covid-19. Unggoy 1: “Sus, kanus-a pa kaha ta mabakunahi no?” Unggoy 2: Ayaw pagdali. Gitestingan pa gani ang bakuna sa mga tawo kon di ba makamatay.”
Apan sa Audubon Zoo sa New Orleans, Louisiana, Estados Unidos, gibakunahan na ang mga gorilla ug mga orangutan isip dugang proteksyon batok sa pagkatap sa Covid-19.
Ang bakuna gimugna alang gyud sa mga hayop sa kompaniya nga Zoetis nga nidonar og kapin sa 11,000 ka doses sa mga zoo sa 27 ka estado latas sa Estados Unidos.
GIPAHUNONG. Si Acting Cebu City Mayor Michael Rama nipahibawo niadtong Oktubre 18, nga gipahunong niya ang clinical trial dinhi sa siyudad sa WestVac Biopharma Co. Ltd. sa bakuna batok sa Covid-19.
Sakto ang unggoy, ang bakuna gitestingan una sa mga tawo. Dinhi pa gyud sa siyudad sa Sugbo. Apan para ni sa tawo, di sa unggoy.
Matod pa sa acting mayor, wa mananghid ang maong kompaniya sa kagamhanan sa siyudad. Kon mananghid, padayon ang clinical trial.
2M KA BAKUNA. Gitaho sa Visayas Vaccination Operations Center (VVOC) nga dunay duha ka milyon ka bakuna batok sa Covid-19 nga wa pa magamit sa Central Visayas.
Miabot sa 5,249,630 ka vaccine doses ang nadawat sa rehiyon hangtod sa Oktubre 15, 2021 apan nihinay ang pagbakuna, matod pa ni Dr. Mary Jean Loreche sa VVOC.
Niadtong Oktubre 16, ang volunteers sa All-terrain Medical Relief Organization (AMRO), Cebu Dental Society ug JCI Metro Uptown, personnel sa Department of Health ug Mitsumi nakabakuna og 1,516 ka mga kawani sa Mitsumi sa Danao City. Pabakuna na mo aron di mausik ang bakuna.
MAKAHADLOK. Nikaratil og dagan sa kahadlok ang mga nag-duty sa impounding area sa Traffic Enforcement Agency of Mandaue (Team) sa dihang mikalit og andar, midagan ug mibusina ang usa ka dumptruck nga way drayber ala una sa kaadlawon, Oktubre 17.
Ang maong “killer truck” maoy nakaligis patay sa lalakeng nagbisekleta sa Marcelo Fernan Bridge niadtong Sabado, Oktubre 16.
Makahadlok. Apan mas makahadlok, matod pa ni Amay, usa ka tigbasa sa SUPER B, kon midagan ang killer truck bisan way ligid.