SUPERBALITA CEBU

Editoryal: Dakong papel sa Sugbo

Editorial art by Ariel Itumay

DAKO ang papel sa Lalawigan sa Sugbo sa bugnong-lugaynon human nagpabilin gihapon nga vote-rich. Nagpabilin kining nag-una sa labing daghang botante sa nasod. Ang nasudnong kandidato nga dako og makuha nga botos dinhi sa eleksiyon, dakong posibilidad nga modaug sa nasudnong posisyon sama sa pagka presidente subay sa resulta sa nangaging piniliay.

Taliwala sa Covid-19 pandemic ug pagpapas sa ubang mga ngan sa listahan, base sa talaan sa Septiyembre 2021, ang Commisision on Elections (Comelec) sa Lalawigan, nitala og pag-umento sa mga botante gikan sa 3.1 milyunes sa 2019, kini niabot na og 3.2 milyunes bisan gipapas ang 362,372 inactive voters.

Gikutlo sa taho nga si Mlbn. Lionel Marco Castillano, provincial elections supervisor, nga dunay dugang 479,265 ka mga bag-ong botante ang napuno ug gipaabot pa nga motaas kini tungod sa paglugway sa rehistrasyon ngadto sa Oktubre 31, 2021. Mao kini hinungdan nga tataw nga nag-una gihapon ang Sugbo sa mga lalawigan sa nasod nga labing daghan og mga botante.

Ug nagsingabot ang nasudnong eleksiyon sa Mayo 2022. Nagbukal ang kawa sa pulitika human sa tagal sa pagsumiter sa certificate of registration (COC) niadtong Oktubre 8. Duna pay kausaban tungod sa substitution sa kandidato nga gikatakda sa Nobiyembre 15 apan nagsugod na ang pagsikad sa ilang pangampanya bisan wala pa magsugod ang election period.

Tungod sa mahukmanong papel sa Sugbo, ang mga politiko ug partido sa pulitika nagprayoridad sa ilang pag-impluwensiya sa mga Sugbuanon ug pagpangulitawo sa suporta sa mga lokal nga opisyal. Mao kini hinungadan nga daghang presidentiables ang kanunay nagbalikbalik sa pagbisita sa Sugbo.

Sa pagkakaron, ang liderato sa lalawigan wala mobutyag kon kinsa ang suportahan sa pagka presidente. Naniid pa ba kaha kon kinsa ang kanunay nag-una sa survey? o Kinsa kaha kanila ang makatanyag mabuwanong kasabotan? Apan kitang mga botante dili magpadala sa maniubra ug gawasnon sa atong balaang katungod sa pagbotar.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!