GAWAS ni Mayor Sara Duterte, kung modagan man siya, para kanako, si kanhi Senador Ferdinand "Bongbong" Romuladez Marcos (BBM) ang pinakalig-on nga kandidato pagka-pangulo.

Gawas nga nahimo siyang gobernador sa ilang probinsiya sa Ilocos ug senador sa niaging mga panahon, hinog na kaayo siya nga molansad sa pinakataas nga puwesto sa kagamhanan.

Niadtong 2016, hapit ug diriyot siyang napiling bise presidente kontra ni Atty. Maria Leonora "Leni" Gerona Robrero. Nahimo lang kontrobersiyal ang iyang pagkapildi tungod sa isyu sa tikas sa botohan. Hangtud karon, wa pay pinal nga hukom ang iyang kaso nga gipasang-at sa National Electoral Tribunal sa maong bugnong lugaynon.

Para kanako, dapat mag-move on na si BBM ug di na siya maghandom pa nga modaug sa maong buroka nga hastang dugaya mahukman. Ambot sab kung gituyo ba nga dugay mahuman ang kaso aron madeklara nga "moot and academic."

Mao usab kini ang nahitabo sa kaso ni kanhi Senador Meriam Santiago batok kang kanhi Presidente Fidel V. Ramos. Nauso ang pulong nga "dagdag-bawas" niadtong panahona nga gisulat pa gani sa senadora sa iyang libro kabahin sa tikas sa eleksiyon sa Pilipinas.

Dugang pa nga anaay dakong balwarte si BMM sa Northern Luzon tungod sa hupot sa iyang pamilya ug sa partidong Kilusang Bagong Lipunan (KBL) sa iyang amahan.

Di pud mabangbang ang bahandi nga gihuptan karon sa pamilyang Marcos, wa pay labot ang "hidden wealth", "historical notes", "Yamasita Treasure" ug toneladang "gold bullions" nga sila lang ang nasayod kung asa gibutang.

Sa laing bahin, adunay apan o problema ang iyang kandidatura nga para kanako makadiskaril o makapahinay sa iyang tsansa nga modaug pagka-pangulo.

Una niini mao ang pagkapildi niya pagka-bise presidente batok sa wala mailhi nga biyuda sa usa ka "cabinet member" ni Presidente Pinoy. Dili malikayan nga mosulti ang tawo nga napildi na siya pagka-bise, sa pagka-presidente na kaha?

Ikaduha mao ang way kinutubang isyu sa Martial Law nga hangtud karon dili dawaton ni BBM nga sad-an ang ilang pamilya. Bisan kon gibayran na ang mga "human rights claimants" gikan sa tinagong bahandi sa Marcos moingon gihapon siya nga way sala ang administrasyon sa iyang amahan nga gikasakit sa mga biktima.

Ang ikatulo mao ang isyu sa iyang edukasyon. Hangtud karon, nagpabiling talinghaga ang iyang kuwalipikasyon kung nakagraduwar ba siya sa kolehiyo o wala? Hinuon dili resikitos sa pagdagan kung nakakolehiyo o wala, ang problema mao ang di niya pagsulti sa matuod.

Ang ikaupat nga problema ni BBM mao ang kahinay niya sa bisaya ug mas sa Mindanao. Bisan unsaon niya'g pangampanya, di niya maliso ang kadaghanan dinhi tungod sa Martial Law ug sa ingon nato nga paghikalimot sa Marcos administration sa kahimtang sa Mindanao, apil ang gitawag nga "Mindanao conflict" tali sa Muslim ug kagamhanan sa nangaging panahon.

Busa, nagkinahanglan siya'g lig-ong ka-tandem nga makahakot og boto sa Visayas ug Mindanao sama pananglit ni Mayor Sara Duterte nga hangtud karon nagsige pa'g paigot kung modagan ba pagka-presidente o bise presidente. Kung dili maluksohan ni BBM kining mga problema, goodbye na lang sa iyang ambisyon!