MATI CITY, Davao Oriental -- Giandam na sa kapulisan sa siyudad sa Mati ang pagpasaka og kasong paglapas sa Presidential Decree (PD) 705, kun Forestry Reform Code of the Philippines, batok sa tulo ka mga lalaki nga nakit-ang nagkarga og mga pinutol nga kahoy.
Nakumpiska sa mga sakop sa Special Weapons and Tactics (Swat) team sa pagpanguna ni Police Lieutenant Colonel Ernesto Gregore alas 12:30 sa buntag Oktubre 23, 2021 ang mga pinutol nga kahoy nga Lawaan sa Purok Rosal, Barangay Buso, Mati City.
Base sa report, nagpahigayon og pag-ronda ang mga sakop sa Swat dihang ilang naagian ang duha ka mga single motorcycle nga may kargang mga pinutol nga kahoy.
Wala suma pa'y napakita nga permit ang tulo ka mga lalaki nga sila Aldrin Serrano, 19-anyos, Arjie Mandabon, 21-anyos nga pulos mga taga Calapagan, Lupon, Davao Oriental ug Noeh Miras, 47-anyos, taga Don Mariano Marcus, Lupon, Davao Oriental.
Nakumpiska sa kapulisan ang 26 ka mga pinutol nga kahoy sa lawaan ug ang duha ka mga motorsiklong gikargahan sa mga kahoy.
Depensa sa tulo ka lalaki gipadala lamang kanila ang mga kahoy nga mao na sab karon ang gipanubayan sa awtoridad. (Jeepy P. Compio)