HUMAN mitiurok ang ihap sa mga kaso sa coronavirus disease 2019 (Covid-19) sa siyudad sa Davao, gimando karon ni Mayor Sara Duterte-Carpio ang paglibkas sa liquor ban ug curfew nga moepekto sa alas 12:01 sa tungang gabii Martes, Oktubre 26, 2021 hangtud sa Enero 15, 2022.
Ang paglibkas sa liquor ban ug curfew pinasubay sa bag-ong Executive Order 59, kun "An Order Providing for the Modified Guidelines on Liquor Ban and the Lifting of Curfew within the City" nga nagbasura sa EO 37.
Apan gitin-aw ni Duterte-Carpio nga ang ala 1 sa kaadlawon hangtud alas 8 sa buntag nga liquor ban una ang pandemya epektibo gihapon.
Nagpasabot nga sa maong panahon, way bisan kinsa ang gitugtan nga mobaligya og ilimnong makahubog o bisan unsang alcoholic beverages.
Apil na dinhi ang pagserbi ug pag-inom sulod sa mga bars, restawran, sari-sari stores, palengke, videokihan ug uban pang mga establisementong patigayon.
Gidili sab ang paglala og makahubog nga ilimnon sa mga publikong lugar sama sa mga dalan, aseras ug gawas sa mga ganghaan sa panimalay.
Apan mahimo kining iserbi ug imnon sulod sa mga pribadong propedad.
Samtang ang alas 9 sa gabii hangtud alas 4 sa kaadlawon nga curfew giwagtang na sab. Nagpasabot nga mahimo nang makagawas 24 oras matag adlaw basta nasubay sa patakaran nga mogawas lang sa importanteng mga lakaw o panginahanglan.
Tungod niini, ang EO 37 series of 2021, kun "An Order Extending Until December 31, 2021 the Liquor Ban and Curfew Within the City," giwagtang tungod sa bag-ong EO 59.
Kahinumdoman nga gipahibawo ni Presidential Spokesperson Harry Roque niadtong Oktubre 19, 2021 nga ang siyudad ipahimutang ubos sa Alert Level 3 hangtud sa Oktubre 31, 2021.
Sa kasamtangan, ang dakbayan sa Davao dunay 71.77 percent nga nabakunahan na sa unang dose, samtang 62.19 percent na sab sa ikaduhang dose base sa taho sa Davao City Task Force on Covid-19 niadtong Oktubre 25, 2021.