Editoryal: Makadasig sa pagpabakuna

Eitorial art by Ariel Itumay
Eitorial art by Ariel Itumay

MAAYO kay managsama na ang tulo ka mga siyudad sa Metro Cebu, di na sila mangayo og resulta sa reverse transcription-polymerase chain reaction (RT-PCR) test sa mga taga laing lalawigan nga fully vaccinated nga mosulod dinhi sa Sugbo.

Ang Cebu City na lang ang nahabilin unta kay ang Probinsya sa Sugbo nagpasulod na man sa mga fully vaccinated nga wa na kinahanglana ang RT-PCR test. Maingon na nga nagkahiusa ang Cebu sa pagmugna og mga lakang taliwa sa pandemic.

Nahiamguhan na tingali ni Acting Mayor Michael Rama ug kaubanan nga ang Cebu City ra ang naglahi dinhi sa Sugbo.

Usa ra ba sa mga reklamo sa mga wa pa magpabakuna mao ang kalisod gihapon sa pagbiyahe bisan kon fully vaccinated na ang usa ka tawo. Unsa man kunoy kapuslanan sa pagpabakuna kon pig-utan ra gihapon sa pagbiyahe? Sakto kaayo, di ba?

Ang epekto man gud sa polisiya nga magpig-ot gihapon sa lihok sa mga tawo nga bakunado na, magmugna og pagtuo nga wa diay ayo ang bakuna tungod kay sama ra man og treatment sa tawo nga way bakuna. Magmugna usab ni og sayop nga pagtuo ug pagtan-aw sa mga tawo nga wa magpabakuna nga di tinuod nga epektibo ang bakuna sumala sa gipasiatab sa kagamhanan.

Mao tingali ni ang usa sa mga dakong rason nga daghan sa mga tawo nga wa na ganahi nga magpabakuna kay wa man silay makuha. Kon raffle lang ang saligan, pila ra sab ang premyo, di makadani og mga tawo.

Basin pa, mas makadani ni og mas daghang mga tawo nga magpabakuna kay pinaagi niini, sayon na lang ang ilang pagbiyahe. Labina sa mga tawo nga gihasulan na sa mga rekisitos nga gikinahanglan alang sa pagbiyahe. Daghan baya kaayo.

Hinaut nga kining pagpalugak sa pagbiyahe tabok sa lainlaing mga lalawigan sa fully vaccinated nga mga tawo makakombinser na bisan niadtong nagdumili og maayo sa pagbakuna na. Hinaut pang mag merry atong Christmas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph