LIMA ka barangay ang na-apektuhan ug 214 ka pamilya ang gipabakwit resulta sa grabeng baha sa Lungsod Sogod, Sugbo niadtong Lunes sa gabii, Oktubre 25.

Ang mga apektadong pamilya namakwit sulod sa simbahan sa Saint James the Apostle, adunay nagpasilong sa barangay hall, health center nga kasamtangang gihimong evacuation center.

Si Police Corporal Jose Rostel Hortelano, Sogod Police Station nagkanayon sa dihang nahinabi sa Superbalita Cebu nga ang Sityo San Lorenzo, Barangay Poblacion gibana-bana nga moabot sa liog ang gilawmon sa tubig-baha.

Laing barangay nga gilunopan naglakip sa Bagatayam, Damolog, Bawo, ug Ibabao.

Sumala pa ni Hortelano nga adunay buhawi nga mi-igo sa bukid.

Ang Sityo San Lorenzo sa Poblacion maoy grabeng na-apektuhan sanglit lupa ang maong area, samtang sa ubang nahisgutang barangay taga-tuhod ang gilawmon sa tubig.

Ang hepe sa Sogod Municipal Disaster Risk Reduction Management Office, Helen Zamora mibutyag nga adunay 214 ka pamilya ang na-apektuhan gikan sa lima ka barangay.

Sumala pa nga nagsugod ang uwan sa 3:00 sa hapon niadtong Lunes, mibunok nianang 6:30 ngadto na sa 7:30 sa gabii.

Paspas ang pagsaka sa baha nga gidunganan sa pag-igo sa buhawi sa bukid. (GPL)