HANGTUD Martes sa hapon, Oktubre 26, anaa sa red level ang tubig sa dakong dike sa Jerome Street, Barangay Centro, Agdao District, Davao City human ang tubig nga gikan sa ibabaw nga bahin sa Lanang ug Buhangin anaa miagi sa maong dike.
Lunes sa gabii, Oktubre 25, perteng bundak sa kusog nga ulan bunga sa Inter-Tropical Convergence Zone (ITCZ) nga nagpasulabi sa area sa Mindanao, partikular sa Davao Region.
Human sa kusog nga ulan, alas 9 sa gabii halos taga atop ang lebel sa tubig sa ulan sa kabalayan sa Laverna Hills, Davao City.
Daghan sab nga lugar sa Davao City ang gibaha apan wala gikatala nga namatay sa insidente.
Sa kakusog sa ulan, naa sab mga panimalay ang nangaguba sa Barangay Tigatto, Buhangi District, Davao City human sa natigayong landslide.
Gilayon sab nga miresponde ang mga rescuers partikular ang Urban Search and Rescue (Usar) team sa Central 911 sa mga lugar nga nabahaan sa pag-rescue sa mga residente.
Daghan sab nga mga residente ang wala na mibiya sa ilang mga panimalay ug gipili nga bantayan na lang ilang mga butang aron dili mahimuslan sa mga kawatan.
Sa pagsuwat ning balita Martes, Oktubre 26, wala pa mipagula og listahan sa mga apektado nga pamilya ang Davao City Risk Reduction and Management Office.
Nagbantay 24-oras ang Usar team sa Central 911 kung ugaling masubli ang kusog nga pag-ulan. (Jeepy P. Compio)