USA ka anak sa negusyante sa Davao City ang gidakop sa National Bureau of Investigation (NBI)-Davao Region Martes sa buntag, Oktubre 26, sa Ilustre Street, Davao City.
Gipatago sa awtoridad ang pangalan sa dinakpan kinsa usa ka babaye ug nagpuyo sa dako nga subdivision sa siyudad.
Luyo niini, dungan sab nga gidakop sa laing lokasyon ning dakbayan ang duha ka mga lalaki kinsa giingong kauban sab sa naunang gidakop.
Sa impormasyon nga nahipos sa Superbalita Davao, gisilbi ang warrant of arrest batok sa naunang suspek sa kasong syndicated estafa.
Gilayong giposasan ang duha ka mga lalaki kinsa mga edaran na ug giingong mga abogado nga maoy mipapel sa mga dokumento nga gipalakaw sa naunang suspek.
Giingon sa awtoridad nga 2019 nasikop na sab sa NBI-Tagum City ang naunang suspek sa kasong syndicated estafa.
Nakapiyansa ang babayeng suspek kinsa alegasyong nagpadayon na sab kini sa iyang ilegal nga hinimoan.
Wala una gipagula sa NBI-Davao ang tibuok detalye sa ilang operasyon kagahapon nga gikalambigitan sa anak sa usa ka negusyante sa Davao City. (Jeepy P. Compio)