IMBESTIGAHAN sa Department of Education (DepEd)-Panabo City ang ilang bag-ong napromotar nga opisyal kinsa nanghulga nga lubaon ang delivery courier human nga dili mao ang giorder niini.
Mikatap ang video sa online niadtong Lunes, Oktubre 25, orihinal nga gi-post sa Tagumeño Disiplinado 2.0, kon diin ang delivery rider gihulga gamit ang gunting sa bana sa kustomer human makadawat og pakite nga wala nila giorder.
Makita sa nag-viral nga video, giablihan sa kustomer ang pakite ug nasayran nga di kini ang butang nga ilang giorder, hinungdan nga wala nila gidawat.
Ang magtiayon nag-insister nga sila nailad human nga ilang namatikdan nga ang butang di maoy ilang giorder.
Ang rider miingon nga di siya modawat kon iuli ang butang ug customer giingnan nga mohangyo og refund pinaagi sa delivery app nga wala sab masabti sa kustomer.
Iyang gipasabot nga kinahanglan nga mo-demand ang kustomer og refund sa online platform kon asa sila miorder sa butang.
Apan bisan pa sa pag-esplikar ngadto sa kustomer, ang bana napungot ug mition og gunting nga nanghulga nga mangluba sa rider kon di niya ibalik ang bayad.
Napugos ang rider nga ibalik ang kuwarta ngadto sa kustomer tungod sa kahadlok tungod sa panghulga niini.
Nasubay sa mga netizens ang bansagon sa nanghulga sa rider, kinsa prinsipal sa pampublikong tulunghaan sa Panabo City, Davao del Norte.
Gikompirma sab kini ni DepEd-Panabo spokesperson Raul Gacus ngadto sa SunStar Davao sa paghinabi sa telepono nga ang tawo sa nag-viral nga video usa sa ilang personahe. Apan ang principal bag-ohay lang sab natudlo isip supervisor sa DepEd Panabo City Division.
Gipasalig ni Gacus nga mohimo sila og imbestigasyon sa maong insidente.
Base sa inisyal nga imbestigasyon, ang nalambigit nga personahe nagbutyag nga nahusay na sa matag bahig ang maong insidente.
Apan ang tigpamaba nagsulti nga nagpagawas na sila og memorandum nga nagmando nga mo-esplikar ang supervisor sa iyang bahin may kalabutan sa insidente.
"Actually, there was no intention to commit that conduct of unbecoming, as per course of the initial investigation. By tomorrow [October 17], we will continue our investigation to reach out, to conduct the investigation for us to submit the final result to the legal unit," pasalig ni Gacus.
Puno pa niya nga mohukom unya sila kon unsay ipasakang administrative sanction batok sa ilang supervisor, depende sa resulta sa imbestigasyon.
Samtang gipahimangnoan niya ang tanang magtutudlo ug non-teaching personnel nga magbaton og "maximum tolerance" ug pabiling kalma sa bisan unsang sitwasiyon.
Sa pikas bahin, si DTI-Davao regional director Maria Belenda Ambi, sa lahi nga panaghinabi sa telepono, nagkanayon nga ang delivery rider way responsabilidad sa na-scam nga butang nga giorder.