ANG Cebu City Government, pinaagi sa Emergency Operations Center (EOC), nanawagan sa mga business establishment nga siguroon nga adunay igong bentilasyon sa mga lugar nga sirado.
Kini ang awhag ni Konsehal Joel Garganera, deputy chief implementer sa EOC, niining pagluag na sa patakaran sa Inter Agency Task Force (IATF) ubos sa alert level number 2 diin kasagaran sa mga negusyo abli na.
Si Dr. Bryan Albert Lim, consultant sa EOC, nagkanayon nga kon sirado ang usa ka lugar ug di makontrolar ang carbon dioxide (CO2) level, delikado nga motakod ang Covid-19 kon adunay masagol nga nagdala sa virus.
Matod ni Lim nga adunay kahimanan pagmonitor sa CO2 level aron malikayan ang pagkatap sa virus bisan pa kon mag-andar ang ilang mga air conditioning unit basta aduna lay kalutsan ang hangin nga anaa sa sulod paingon sa gawas.
Kini mao ang non-dispersive infrared sensors diin adunay mo-detect kon pila ang parts per million (PPM) sa CO2 sa sirado nga room diin ma-identify kon low risk (700 PPM), moderate risk (700-800 PPM) ug high risk (800-1000 PPM) nga maoy motatak sa gadget.
“Ang technology maoy mo-determine sa CO2 level, pero og kita maayo ang atong ventilation, wala gyud tay angay nga kabalak-an kani nga gadget aron lang pag-measure sa CO2. Pero og matan-aw ang CO2 level nga kaya pa, we can even increase the capacity of the establishments,” padayag ni Garganera.
Ang deputy chief implementer sa EOC nihulagway nga kon mapadayon lang sa mga Sugbuanon ang pagsunod sa minimum health protocol ug ubang protocol batok sa Covid-19, matagamtaman ang kamalipayon sa Pasko ug sa umaabot nga mga kasaulogan sa 2022.(PAC)