MGA establisemento sa dakbayan sa Sugbo gihulagway sa kapulisan nga mi relax na pag-ayo human giubsan ang oras sa curfew atol sa gilusad nga inspection sa gabii sa mga imnanan.
Tungod niini, ang Cebu City Police Office (CCPO) nipahimangno nga kinahanglan mga vaccinated lang mamahimong makasulod sa mga imnanan.
Human sa bag-ong gipagawas nga executive order ni Acting Mayor Michael Rama labot sa pag ubos sa oras sa curfew, milusad dayon og inspection ang CCPO uban sa Business Permit Licensing Office (BPLO) ug Prevention, Restoration, Order, Beautification and Enhancement (PROBE) sa mga establisemento kon misunod ba sila sa kamandoan.
Matod ni Police Lieutenant Colonel Wilbert Parilla, deputy city director for operations sa CCPO, nga nabantayan nila nga daghan ang nalipay nga gi adjust na ang oras sa curfew gikan sa alas 10 sa gabii ngadto na sa alas 11:30.
Nakita usab nila nga mi relax na pag-ayo ang mga establisemento lakip na ang mga tawo tungod sa kataas na sa panahon nga mihugot ang dakbayan sa quarantine protocol.
“Usa sa atong nakita nga hing relax gyud not only ang mga bars but hasta ang mga tawo nga migawas considering mga medyo taas-taas na gyud ang atoang oras usa ta manirado,” matod ni Parilla.
Dugang ni Parilla nga usa sa ilang pahimangno sa mga management sa mga imnanan nga kinahanglan nga tumanon ang mando nga ang mga bakunado lang ang mamahimong maka sulod nga hatagan nilag ilimnon nga makahubog.
Mohimog kinalit nga inspection ang kapulisan uban sa BPLO aron masubay kon ila bang gituman ang lagda sa Kagamhanan sa Dakbayan.
Adunay nadawat nga impormasyon ang CCPO nga pipila ka mga imnanan nga naa sa uptown area nga mopasulod nag kustomer bisan kinsa nga way pagsusi kon bakunado ba o dili tungod kay tinguha nila nga modako ang ilang kita.