MAAYONG balita natong tanan. Daghan nang local government units (LGUs) ang mipaluag sa ilang polisiya batok sa Covid-19 ubos sa pagtugot sa Inter Agency Task Force (IATF) sama sa pagtangtang sa rekisitos nga negative RT-PCR o antigen test sa domestic nga biyahe, pagtugot sa paggawas sa mga menor de edad, pag-abli sa entertainment establishments ug uban pa apan ubos gihapon sa health standard sa bag-ong normal.
Seguradong daghang nagpanikad sa pagpanuroy human sa kapin sa duha ka tuig nga sama sa piniriso ang kinabuhi o limitado ang paglihok bisan sa palibot lang sa barangay tungod sa grabe kaestrikto nga polisiya sa kuwarentina nunot sa pagsaka sa kaso sa Covid-19. Gipaabot nga mas moalegre ang komunidad, mobalik sa pagsaka sa mga mobiyahe ug makabangon ang nahugno nga industriya sa turismo.
Sa dakbayan sa Sugbo, si Acting Mayor Michael Rama niluwat og Directive No 10-25-01 nga naghatag og halapad nga pagtugot sa pag-abli sa mga establisemento ug giya usab sa mas gawasnon nga pagpanuroy sa dakbayan samtang nagpatuman sa health standard, lakip sa panagtapok sa komunidad sa pag-obserbar sa Kalagkalag, Pasko, pagsugat sa Bag-ong Tuig ngadto sa Semana Santa ug eleksiyon sa Mayo 2022.
Ang kompleto sa bakuna batok sa Covid-19 maoy basehanan sa mas daghan og bintaha sa tanang LGUs sama sa dili na pangitaan og negatibong swab test sa pagbiyahe. Taliwala sa pagluag sa polisiya, dili nato abusohan.
Hinumdomi, ang hulga sa virus wala pa hingpit mapapas. Dakong posibilidad sa laing pagsaka sa kaso sa Covid-19 kon dili responsable ang tanan. Dili kita mag-agad sa awtoridad nga mobuyag kanato. Kita mismo ehemplo sa bag-ong pagpakabuhi sa panahon o human sa pandemiya.