TUMANON sa kagamhanan sa Dakbayan sa Sugbo, Mandaue ug Lapu-Lapu ang lagda sa Inter-Agency Task Force (IATF) nga sud sa lima ka adlaw nga pasirhan ang mga sam-ang atol sa paghandom sa Undas ug Adlaw sa Minatay.
Sugod sa Oktubre 29 ngadto na sa Nobiyembre 2, 2021 sirado ang tanang publiko ug pribadong sam-ang lakip na ang columbaria.
Si Cebu City Acting Mayor Michael Rama nagkanayon nga dili siya makig-away sa IATF o DILG apan mahimong dili sila mosunod,.
“Definitely we are not hard headed, we are also mindful. They may have reason at their level though we also have reason of readiness to have it acted upon. So, dili lang usa ta mamugos,” pasabot sa opisyal.
Wa nay bili ang na-unang EO ni Rama nga iya gitugotan nga abli ang mga sementeryo atol sa Undas/Kalag-Kalag apan kadtong lang mga bakunado ang makasulod.
Sa dakbayan sa Mandaue, gi-usab ni Mayor Jonas Cortes ang na-unang Executive Order no. 35 nga iyang giluwatan agig pagtamod sa kamanduan sa IATF.
Sa bag-ong EO ni Cortes, bisan tuod nga sirado ang sementeryo sa Oct. 29 – Nov. 2 buksan lang kini kon adunay ilubong o cremation nga ipahigayon sa maong petsa, apan gikinahanglan nga motamod sa minimum health standards.
Samtang sa dakbayan sa Lapu-Lapu, gisalikway sa IATF ang hangyo ni Mayor Junard Chan nga tugotan nga abli ang mga sementeryo sa dakbayan sa Oktubre 29 ug 30.
“So technically, cemeteries will be closed on the 29th of October to Nov. 2,” tipik sa pahibawo sa public information officer sa Lapu-Lapu, Mark Anthony Bautista.
Susama sa dakbayan sa Mandaue sa na-unang direktiba ni Mayor Chan nga gikan sa Oktubre 31 ngadto sa Nobiyembre 2 sirado ang tanang sementeryo, memorial parks ug columbaria sa katuyoan nga dili magdasok ang mga mobisita.