SINGLE digit na, kun wala na makaabot og 10 ka kaso sa coronavirus disease (Covid-19) ang Cagayan de Oro human unom na lang ka mga residente ang mipositibo sa virus, sumala sa report sa City Health Office sa dakbayan.
Ang kinatibuk-ang ihap sa mga kumpirmadong kaso sa Covid-19 sa syudad anaa na sa 20,101.
Sumala sa report sa City Health Office, pulos mga local index nga mga kaso ang mga bag-ong kaso sa Covid sa dakbayan.
Ang Cagayan de Oro adunay 667 ka mga active cases, 363 niini na-admit sa Northern Mindanao Medical Center ug uban pang mga ospital sa syudad, 470 ang mga outpatients, ug duha ang mga ROFs/LSIs.
Nakatala usab og 15 ka mga coronavirus-positive nga mga kaso nga karon naka-recover human nagnegatibo ang resulta sa ilang repeat swab test.
Anaa na karon sa 18,598 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad naa sa 836 human walay natalang patay ang dakbayan.