MOKABAT sa P7 milyunes kapin nga balor sa gituohang illegal drugs nasakmit sa kapulisan sa Guadalupe Police Station sa Cebu City Police Office (CCPO) Martes sa alas 8:30 sa gabii, Oktubre 26, 2021 sa Andres Abellana St., Dakbayan sa Sugbo.
Ang suspek giilang si Ramilito Navarro Cabajar, 39, taga sityo Guila-Guila, Brgy. Bonbon, bukirang barangay sa siyudad.
Nakuha gikan kang Cabajar ang 1075 gramos sa gituohang shabu nga dunay Dangerous Drugs Board (DDB) value nga P7, 310,000.
Matod sa kapulisan nga ang hatdanan ni Cabajar og drugas mao ang Brgy. Guadalupe, Quiot, Bonbon ug Malobog.
Ang iyang tinubdan sa illegal drugs usa ka piniriso sa New Bilibid Prison sa Muntinlupa City.
Ang mga transaction gipaagi sa tawag ug text messaging kay di siya kahibawo sa paggamit sa internet.
Wa pa gisulti sa kapulisan kinsa ang amo ni Cabajar.
Uban sa operasyon ang Philippine Drug Enforcement Agency (PDEA) 7, Police Drug Enforcement Group (PDEG) 7, Special Operations Unit, Regional Drug Enforcement Unit ug City Intelligence Unit. (REV)