Gipakita sa Los Angeles Lakers nga kaya nilang mobarog bisan wala ang usa sa ilang mga lider nga si LeBron James pinaagi sa ilang overtime nga kadaugan batok sa hosts San Antonio Spurs, 125-121, kagahapon, Oktubre 27, 2021 (RP time) sa National Basketball Association (NBA) 2021-22 season.
Si James, 4-time MVP, wala nakaduwa gumikan kay naangol (sore right ankle) kini sa miaging duwa sa Lakers apan ang kabangis nila ni Anthony Davis ug Russell Westbrook igo na aron maangkon nila ang makutas nga kadaugan.
Nagpakatap og 35 puntos ug 17 rebounds si Davis aron pangulohan ang kadaugan samtang nitampo og 33 puntos ug 10 rebounds si Westbrook.
Ang mihulip sa puwesto ni James sa starting unit sa Lakers nga si Malik Monk kuyaw sab nga nakaduwa ug nitampo kini’g 17 puntos alang sa kadaugan.
Ang Lakers, nga ningsaka sa 2-2 nga rekord, nag-amping sa kondisyon ni James hinungdan nga wala kini nila giahat pagpaduwa bisan dili grabe ang angol niini.
“We understand that with (James’ absence) comes the responsibility of making guys around us better,” matod ni Westbrook. “And tonight, I thought A.D. did a great job of just being aggressive all night, miss and makes, finishing well around the basket. He was big for us tonight.”
Sa ilang bahin, ang Spurs gipangulohan ni Dejounte Murray pinaagi sa iyang triple-double nga 21 puntos, 15 assists ug 12 rebounds apan nasipyat siya sa iyang jumper sa himatyong mga segundos nga posible untang makapadaog sa iyang puwersa.
Ang Spurs, nga nahagbong sa 1-3 nga rekord, nakadawat sab og 27 puntos ug 14 rebounds gikan ni Jakob Poeltl samtang nitunol og iyang season-high nga 21 puntos si Lonnie Walker IV. (AP)