Naabot na sa New York si Filipino Jonas Sultan kagahapon, Oktubre 27, 2021 (RP time) alang sa umaabot niyang malisod nga tahas.
Si Sultan, kinsa kanhi sakop sa nasira nga ALA Boxing Stable sa Sugbo, makigbatok sa bag-ong knockout artist sa Puerto Rico nga si Carlos Caraballo karong Oktubre 31, 2021 (RP time).
Mas taas man tuod og kasinatian si Sultan apan dili ikalimod nga usa ka dakong hagit kaniya ang pagpakigbatok kang Caraballo, kinsa adunay 14-0 nga rekord nga gibuwakan og perpektong 14 ka knockouts.
Hinuon, gipadayag nang daan ni Sultan nga wala siya mahadlok bisan gamay sa rekord ni Caraballo.
Si Sultan, kinsa naggunit og 17-5, 11KOs nga rekord, wala pa sukad natumba sa tanan niyang mga away.
Kauban ni Sultan sa iyang paghiabot sa New York mao ang iyang chief trainer nga si Joven Jimenez, promoter Brendan Gibbons, ug International Boxing Federation (IBF) super flyweight king Jerwin Ancajas.
Si Ancajas maoy sparmate sa pagpangandam ni Sultan alang ning maong tahas. (ESL)