Wala’y palabyon nga oportunidad si Philippine top gymnast Carlos Yulo kabahin sa iyang tinguha nga makapakita’g aksyon sa 2024 Paris Olympics.
Wala pa man tuod pormal nga detalye kabahin sa partisipasyon ni Yulo sa sunod nga edisyon sa matag upat ka mga tuig nga kompetisyon apan giplano nang daan sa Gymnastics Association of the Philippines (GAP) nga paapilon si Yulo sa tanang unom ka events sa gymnastics competition sa Olympics.
Matod ni GAP president Cynthia Carrion nga gawas sa paboritong events ni Yulo nga floor, vault, ug parallel bars, pasalmuton sab nila ang 21 anyos nga gymnast sa pommel horse, horizontal bar, rings events.
Si Yulo nikampanya sa iyang paboritong event sa bag-uhay lang nahuman nga 50th FIG Artistic Gymnastics World Championships diin nakabira siya og gold ug silver medals.
Sa sunod tuig, si Yulom kinsa adunay 4’11” nga gitas-on, mopakita og aksyon sa sunodsunod nga kompetisyon sa sunod tuig.
Moduwa si Yulo sa 2022 Asian Games sa China, Southeast Asian (SEA) Games sa Vietnam, ug 51st FIG Artistic Gymnastics World Championships sa Liverpool isip tipik sa iyang preparasyon sa sunod nga Olympics.
Si Yulo dayag sa iyang gibating kasagmuyo sa dili maayo niyang performance sa miaging Tokyo Olympics hinungdan nga misaad siyang makabawi sa Paris Games. (ESL)