FAMILA N. JIMENEZ
Lindogon, Sibonga, Cebu
Dihang mitaliwan ang kanhing ako
ug natawo ang bag-ong linalang
nakita ko ang nanganawkanaw nga bangaw
nga mi-arko sa kapunawpunawan.
Buot ko nang buhian ang pagbati
nga gilaming sa dugay nang katuigan,
pilion ug iladlad ang kamatuoran,
pasagdan ang pintas nga hukom sa uban.
Mao na kini karon ang takna sa pagtaak
aron masinati ko ang sidsid sa kagawasan.
Di ko igsapayan ang tanang kalisdanan
kon ang kalipay ko maoy sangputanan.
Kining pagka tawo nga puno sa kalibog
himuon kong taming sa pagkahimatngon
nga ang sama nako nga nahimong gawasnon
may luna aron ang kalibutan magmabulukon.