LESLIE M. ZANORIA
Tagunol, Cogon-Pardo, Cebu City
Sa pagbunok sa luha sa kahitas-an
Mingaab usab ang katawhan.
Midanguyngoy ang atong kaigsuonan
Agulo ang nabati sa tibuok dakbayan.
Gisabwagan kita sa kangiob sa dag-om
Sa kapanganoran nga naglugitom.
Kahagip-ot ug kasakit nga di manamilit
Kanunay sa kalibutan nagpamahit.
Angay nga kita may ensaktong proteksyon
Ug hustong pagkaon nga tugob sa nutrisyon.
Mga bata ug tiguwang walay pagapinigon
Kay sa Diyos managsamag pamayhon.
Ipadayag ta Kaniya ang hugot nga pangamuyo
Ang kinasingkasing ug tiunay nga pag-ampo.
May dalan nga Iyang gilatid sa tagsa kanato
Ug kita angay sa tukmang mga lakang mosugo.