LAMBERTO G. CEBALLOS
Ilaya, Cawayan, Dalaguete, Cebu
Bag-o lang gyud nahuman ang pagpaminaw ni Treb kang Dean Martin nga mikanta sa Non Dimenticar sa You Tube. Ang iyang laptop maoy iyang gigamit sa pagtan-aw. Classic na ning awita kay sa iyang nahinumdoman 1963 pa na-popular kini. Disiutso pa iyang edad niadto ug ulitawo pa. Nasag-ulo niya ang maong kanta ug maoy iyang awiton sa panahon nga magtagay ang iyang barkada nga kalagmitan adto sa panimalay nilang Wendell nga maoy moduyog nila sa piyano. Dili pod niya malimtan kining awita kay mao niy gihimo nilang theme song ni Estrella, ang unang babaye nga nahimo niyang trato.
(Non dimenticar means don’t forget you are my darling./ Don’t forget to be all you mean to me.)
“Ikaw ra gyud ang akong mahalon, Estrella, samtang ako may kinabuhi pa. Ikaw ray akong panggaon,” hagawhaw ni Treb samtang hugot nga naggakos sa dalaga human sa ilang mainiton nga panaghalok. Diha sila sa ilawom sa punoan sa kaymito sa hardin sa balay nilang Estrella sa Guadalupe.
“Isaad ko sab, Treb, nga way laing lalake nga makatag-iya sa akong kasingkasing. Alang da gyud kini kanimo,” ni Estrella nga miyanghag sa ambungang panagway ni Treb.
(Non dimenticar my love is like a star, my darling./ Shining bright and clear/ just because you’re here.)
“Panggaon tika, mahal, kay ikaw maoy masigang bituon nga mobanwag kon mongitngit ang akong dalan nga agian,” ni Treb.
“Hinaot unta, mahal, di magkabuwag ang atong mga kinabuhi. Buot kong kanunay akong naa sa imong kiliran,” ni Estrella nga nagtibi, kahilakon.
(Please do not forget that our lips have met/ and I’ve held you tight, dear./ Was it dreams ago my heart felt the glow?/ Or only just tonight, dear?
Apan dili matag-an ang dagan sa kinabuhi sa tawo. Si Estrella nga nahimong doktora milalin sa Amerika ug didto na mo-praktis sa iyang pagka mananambal. Naminyo siya sa usa ka Pinoy nga doktor sab. Sa laing bahin si Treb nahimong abogado ug naka-asawa og usa ka mauswagong CPA ug magpapatigayon dinhi sa dakbayan sa Sugbo. Malinawon ug malipayon sila sa tagsa-tagsa nila ka kinabuhi.
(Non dimenticar although you travel far, my darling./ It’s my heart you own/ so I’ll wait alone.)
Bisan wala nay komunikasyon sila si Treb ug si Estrella, sa tagsa-tagsa nila ka paghandom ang ilang gugma ug kinabuhi kaniadto nagpabilin nga buhi. Sa gabiing mamingaw manumbalik sulod sa tagsa-tagsa nila ka lawak ang paghandom sa matam-is nilang kagahapon.
Unya mitaliwan sa laing kinabuhi ang bana ni Estrella. May tulo sila ka anak nga puro na de-pamilya. Sa laing bahin miuna sa langit ang asawa ni Treb. Ang duha nila ka anak may kaugalingon na sab nga mga pamilya. Busa, nag-inusara na sila si Treb ug Estrella sa ilang kinabuhi.
(Se si separo, se si allontano/ L’ala del destino/ Non ne no colpa, no. e ni sentro sempre a te vicino.
USA ka buntag samtang didto si Treb sa sala sa ilang balay nag-inom og kape mikuriring ang telepuno. Iyang gipunit ang awditibo. “Hello? Good morning! Who’s this?”
“Si Estrella ni, Treb! Nakalimot na ka nako? Ako wa gyud makalimot nimo!”
“Wa tika hikalimti, mahal. Ikaw baya ang pinangga ko! Nia na ka sa Pinas, sa Cebu?”
“Yes. I called up to invite you to my 75th birthday celebration tonight diri sa among ancestral home sa Guadalupe. Please come! I miss you so much!”
“I’ll come. I miss you, too!” ni Treb nga gibati og kalipay, daw may buntog nga mikapakapa sulod sa iyang dughan. (KATAPUSAN)