SA IKADUHANG tuig, gipasirhan gihapon sa Inter-Agency Task Force (IATF) ang mga sementeryo atol sa Adlaw sa mga Santos ug Adlaw sa mga Patay. Mao ni ang ilang gibuhat sa miaging tuig. Ang hangyo sa mga local government unit (LGU), apil na dinhi sa Sugbo gibasura. Bisan sa ilang hangyo ug kaseguroan nga estriktong ipatuman ang mga health protocol, wa kini paminawa sa IATF.
Sa Dakbayan sa Sugbo lang, nag-andam na gud apil ang kapulisan aron mapatuman ang mga health protocol alang sa pagbisita sa fully vaccinated nga mga tawo. Duna na say mga lakang nga ipatuman sama sa pag limit sa oras sa pagpabilin sa sulod.
Unta, sa mga dapit nga minos na kaayo ang mga kaso sa coronavirus disease 2019 (Covid-19), sama sa Sugbo, hatagan unta og mas dakong gahum sa paghukom ang mga LGU nga mas nasayod sa dagan sa tagsa ka dapit ug kanunay nga malampuson sa pagpatuman sa mga health protocol.
Malampuson ang mga LGU dinhi sa Sugbo sa pagkontrolar sa mga kaso sa Covid. Kini nagpasabot nga responsable kaayo ang mga lokal nga kagamhanan sa ilang mga tahas ug gimbuhaton nga may kalabutan sa Covid.
Ang gibuhat unta sa IATF mao ang paghatag og mas dakong papel sa mga LGU nga ubos sa alert level 2. Ilang gipa-submit ang mga plano niini sa regional level nga maoy mosusi sa mga hangyo nga gipataban ang plano.
O kaha ilang gitugtan ang mga dapit nga naa sa alert level 2 sa pagbukas sa mga sam-ang sa Nobiyembre 1-2 samtang ilang mandoan ang mga LGU sa pagduso sa ilang plano sa pagpatuman sa mga health protocol.
Ang Cebu City naghan-ay na sa ilang mga plano ubos sa konsultasyon sa nagkadaiyang mga buhatan, apil na sa kapulisan. Duna na gani traffic plan nga gipahaum alang sa pagpatuman sa mga health protocol. Unta, ning higayuna, ang mga LGU gihatagan og mas dakong papel sa Kalag Kalag kay duna silay kapabilidad.