Gikalipay sa mga tawo ang paglibkas sa pagsul-ob og face shield sa dakbayan sa Ormoc.
Si Mayor Richard Gomez nimando niini human gipaboran sa Inter Agency Task Force against Covid-19 ang iyang hangyo.
Martes, Oktubre 26, 2021, ang Business Permit and Licensing Office (BPLO) nipahibawo sa tanan business establishments sa kamanduan.
Matod ni Joel Mendoza, labaw sa BPLO, padayon lang gihapon ang pagpasul-ob sa face mask ug pag-scan sa quick response (QR) code.
Base sa Executive Order 210 ni Gomez, kadto lang mga pasahero sa pampublikong sakyanan nga way hangin nga makalusot ang mag sul-ob og face shield o kadtong mga air-conditioned.
Gipaluagan sa dakbayan sa Ormoc ang pipila ka mga patakaran gumikan sa sunod sunod nga pag ubos sa mga kaso sa Covid-19.
Gani, wala nay mga rekisitos kon mosulod sa land border sa dakbayan.
Apan inig gawas, dapat ma-scan ang QR code.
Ang mga gikan sa Cebu, kinahanglang dunay negative RT-PCR test ug QR code apan kon fully-vaccinated na, ang vaccination card lang ug QR code ang ipakita.
Gilibkas na usab ang modified liquor ban, pwede na maka-serve ang mga imnanan ug restaurant. Ang mga tindahan pwede na makabaligya.
Gidili lang ang pag inom sa pampublikong lugar.
Gianunsyo sa Department of Health (DOH) nga naa na sa low risk ang classification sa Pilipinas apan gihangyo ang publiko nga di magkompyansa.
Padayon gihapon ang pagsul-ob sa face mask ug pagtuman sa social distancing.
Gibantayan karon sa DOH ang mga super spreader activity hilabi na sa nagsingabot nga Pasko ug Bag-ong Tuig.