Gipasakaan og kaso sa National Bureau of Investigation (NBI) 7 ang usa ka bank manager sa Oktubre 26, 2021 sa Cebu City Prosecutor’s Office tungod sa pagdumili sa paghatag og footage sa closed circuit television (CCTV) camera sa pag-withdraw sa usa ka tawo o mga tawo sa ATM machine sa banko sa Asiatown IT Park, Brgy. Apas, Dakbayan sa Sugbo.
Ang tag-iya sa account gidagit niadtong Nobiyembre 24, 2020 sa B. Rodriguez St., Sambag 2, Dakbayan sa Sugbo, atbang sa usa ka publikong tambalanan, apan dunay mga withdrawal sa iyang account pagkasunod adlaw.
Sa ilang giluwatang pamahayag, ang NBI 7 niila sa ilang gipasakaan og kaso nga kalapasan sa Presidential Decree 1829 kun Obstruction of Justice nga mao si Lorelei Malinao Ontanillas, branch manager sa usa ka sikat nga banko.
Matod sa NBI nga si Ontanillas nidumili sa makadaghang mga higayon sa paghatag og kopya sa footage sa pag-withdraw sa automated teller machine (ATM) sa tawo nga gituohang maoy nidagit kang Natividad.
“The NBI sent letter-requests and subpoenas to Ontanillas, in her capacity as bank manager for numerous occasions to provide CCTV footages and the information where these withdrawals had been made but these were summarily refused citing the provisions under the Law on Secrecy of Bank Deposits, General Banking Law and Foreign Currency Deposit Act of the Philippines,” matod sa pamahayag.
Apan sa pagtan-aw sa ilang Legal Division sa kaulohan, ang mga balaud nga ginganlan ni Onillas di mabasehan kay ang gidili mao ang pagsusi sa usa ka deposito ug mga investment niini.
“Such matters are totally different from the footages of transacting persons captured by the ATM of the subject bank,” matod sa NBI.
Gusto sa NBI nga mailhan ang mga tawo nga nagdagit kang Natividad kay dunay withdrawal sa iyang account nianang pagkasunod adlaw, Nobiyembre 25.
Nausban pa kini og makaduha hinungdan nga gusto silang masayod diin kini mahitabo.
Matod sa NBI nga ang ilang gipangayo mao ang CCTV footage nga nakakuha sa pagdagit kang Natividad, di ang iyang deposit.
Si Natividad, 39, taga dan A. Lopez, Barangay Calamba, Dakbayan sa Sugbo wa na igkita sukad sa iyang pagkawala.
Ang iyang pamilya unang nidangop niadtong Enero sa Anti-Kidnapping Group (AKG) 7 mga duha ka buwan human sa pagpanagit.
Ang iyang kapuyo niasoy nga duha ka mga sakyanan ang niabot, usa ka gray nga pick-up ug puti nga Mitsubishi Adventure.
Nagtuo siya nga ang mga sakay sa pick-up maoy nidala kang Natividad samtang ang Mitsubishi Adventure maoy nisalipod aron di makita unsay nahitabo.
Usa ka tawo nga nag-hood nga dunay gidalang hait nga hinagiban ang nakita sa pamilya nga sakay sa Mitsubishi Adventure.
Gitawgan pa ni Natividad ang iyang kapuyo, apan ang iya nang higala ang nitubag sa tawag tungod sa kahadlok human sa hitabo.
Nagduda ang iyang pamilya nga mga awtoridad ang nidagit kang Natividad. (REV)