Suspetsadong kawatan nasikop kay nigamit sa selpon nga kinawat alas 3:00 sa kaadlawon sa Miyerkules sa Purok Talong 3, Brgy. South Poblacion, dakbayan sa Naga.
Ang nakabuko kaniya mao ang iyang paggamit og Facebook gamit ang giingong kinawat nga cell phone.
Si Josal Lauglaug Antiporta, 22, ulitawo, tigtunaw og tingga, taga Brgy. Buenavista, dakbayan sa Carcar, nasikop sa follow up operation sa kapulisan.
Si Mary Cris Cantonese Amaro, 32, minyo, kawani sa usa ka real estate company, residente sa Purok Talong 3, Brgy. South Poblacion, dakbayan sa Naga, nangayog abag sa kapulisan.
Ang biktima nibutyag sa kapulisan nga usa ka kawatan ang nidala sa iyang cash nga P6,000, usa ka unit sa iPhone, usa ka unit sa Vivo V5s cellphone, usa ka unit LG G3 cellphone ug usa ka relo.
Si Police Staff Sgt. Organe Lungtad, sa Naga Police Station nga nahinabi sa Superbalita Cebu nagkanayon nga si Amaro nibutyag nga nakamata siya gumikan sa kasaba sa mga iro nga nagsigeg paghot sa gawas.
Mibarog siya aron pagsusi ug nakit-an ang usa ka tawo nga nagdalig lakaw palayo sa ilang balay ug nipadulong sa usa ka boarding house.
Sa pagsusi niya sa ilang balay, iyang nasuta nga giguba ang bintana nga jalousies, gipugos sa pag-abli.
Nahanaw ang cash, ingon man mga mahalong selpon ug relo. Nagdali siya sa pagpangayog abag sa kapulisan.
Nasubay si Antiporta kay na traced ang location sa cellphone ni Amaro.
“Kining suspek nigamit sa selpon sa biktima , nag-open daw siya sa iyang FB. Unya duna may locator, nahibaw-an nga naa ra sa duol,” dugang ni Lungtad.
Si Police Master Sgt. Jake Catane, imbestigador sa Naga Police Station nga nahinabi sa Superbalita Cebu, nagkanayon pinaagi sa cellphone ni Amaro natumbok nila asang dapita.
Ilang gisusi ang boarding house nga gipuy-an ni Antiporta diin kini nasikop ug nakuha ang mga butang ug cash.