Ang Abraham Lee Construction Incorporated (ALCI) ni-donate og columbarium pre-fabricated steel form (CPSF) ngadto sa Cebu City Government nga gi-donate usab sa Siyudad ngadto sa Simbahang Katoliko para mapaspasan ang paghimo sa mga nitso.
Si Konsehal Jerry Guardo, chairman sa committee on infrastructure sa Konseho, maoy nahimong instrumento para makabaton niini ang Siyudad ug mapahimuslan sa mga sementeryo.
Ang CPSF maoy gamiton sa sam-ang nga nahimutang sa Cabantan street, Barangay Luz, Dakbayan sa Sugbo aron dili na sila mogamit og mga kahoy, plywood ug mapaspas na usab ang paghimo sa nitso.
Matod ni Guardo nga iyang tinguhaon nga ang ubang dagkong mga sementeryo sa Cebu City nga makaangkon sab og sama sa magamit sa sementeryo sa Cabantan.
“There is a big possibility that we can also accomodate the request of other cemetery kon gusto sila ani nga pre-fabricated steel form kay nasabtan nako ang incovenience kon ato ning ibalhin sa lainlaing cemetery”, padayag ni Guardo.
Ang CPSF maoy makapadali sa construction sa nitso nga dili na magkinahanglan og kahoy, plywood ug mahimo nang magamit sa paglabay sa 48 oras nga maoy makapadali sa paghimo sa nitso.
Gitug-an ni Guardo nga mokantidad og P100,000 ang lima ka hulmahan sa nitso nga gi-donate sa ALCI nga maoy gitinguha sa konsehal hilabi na niadtong nidaghan ang namatay sa Covid-19.
Si kagawad Tito Durano sa barangay Luz nagkanayon nga ang sementeryo sa Cabantan sirado para sa pagbisita sa kabanay sa mga namatay gikan Oktubre 29 hangtod Nobyembre 2 base sa kamanduan sa Department of the Interior and Local Government (DILG). (PAC)