Magsugod na ang Pilipinas sa tibuok nasud sa pagbakuna sa mga menor de edad nga nag-edad og 12 hangtod 17 anyos batok sa coronavirus disease 2019 (Covid-19) karong Nobyembre 5, 2021, ang Department of Health (DOH) nipahibawo sa Miyerkules, Oktubre 27.
Si DOH Undersecretary Maria Rosario Vergeire niingon nga ila nang gihimo ang guidelines alang sa pagpalapad sa Covid-19 vaccination sa mga menor de edad, nga prayoridad nga ihatag ngadto sa 12 ngadto sa 17 anyos nga adunay comorbidities.
Apan si vaccine czar Carlito Galvez Jr. niingon nga ang pagbakuna sa tibuok nasud sa mga menor de edad mahimong magsugod sa Nobiyembre 3.
Matod niya nga adunay dul-an sa 50 ka dugang nga mga ospital diin ipahigayon ang pediatric vaccination.
Sa sayo pa, si Galvez niingon nga ang Nasudnong Kagamhanan nagtinguha nga mahuman ang Covid-19 vaccination sa 12.7 milyon nga mga menor de edad sa nasud sa Disyembre.
Matod ni Galvez nga ang pagbakuna sa mga bata makatabang kanila nga makalikay sa grabeng impeksyon sa coronavirus ug alang usab sa ilang mental health, tungod kay sila gi-lockdown sa sulod sa ilang mga panimalay tungod sa quarantine measures nga gipatuman sa gobiyerno.
“Kailangan na bigyan ng kaunting leeway, to play and study at magkaroon sa social ng mga kaibigan. At the same time makapag-Jollibee po sila at Mcdonald’s doon sa mga dine-in po natin,” matod ni Galvez.
Sa Oktubre 26, 18,666 ka mga menor de edad nga adunay comorbidity nakadawat sa ilang unang dose sa bakuna atol sa inisyal nga hugna sa pediatric vaccination sa National Capital Region (NCR).
Ang mga bakuna sa Pfizer ug Moderna ra ang giaprobahan nga idapat alang sa populasyon sa kabataan.
Giawhag sa gobyerno ang mga ginikanan ug guardians nga iparehistro ang ilang mga anak sa ilang tagsa-tagsa ka local government unit alang sa bakuna batok sa Covid-19.
Sa laing bahin, ang DOH nagpadayon sa pag-awhag sa mga hamtong, ilabina sa mga sakop sa priority groups A2 ug A3, nga magpabakuna batok sa Covid-19 aron makab-ot ang cocoon effect, nga nanalipod sa mga bata sa panimalay.
Gihatagan pa og gibug-aton sa departamento nga ang pagpili sa pagpabakuna dili lamang mapanalipdan ang tawo mismo, apan lakip na ang mga tawo sa palibot, uban ang estrikto ug relihiyoso nga pagsunod sa minimum nga mga sumbanan sa panglawas sa publiko ug uban pang mga pamaagi sa pagpugong nga gipatuman. (Uban sa PR / SunStar Philippines)