Dakong lapida gibutang sa Transcentral

PASIDAAN: Si Cyril Velasco (ikaduha gikan sa wala), tag-iya sa Garnet Driving School, uban sa mga opisyal sa Highway Patrol Group (HPG) 7 ug Barangay Busay atol sa pagmuntar sa dakong lapida nga nagpasidaan batok sa aksidente ning nagsingabot nga Kalagkalag. / Arnold Y. Bustamante
PASIDAAN: Si Cyril Velasco (ikaduha gikan sa wala), tag-iya sa Garnet Driving School, uban sa mga opisyal sa Highway Patrol Group (HPG) 7 ug Barangay Busay atol sa pagmuntar sa dakong lapida nga nagpasidaan batok sa aksidente ning nagsingabot nga Kalagkalag. / Arnold Y. Bustamante

Dakong lapida nga adunay suwat nga “Ride Safe or Ride In Peace” gibutang sa daplin sa karsada sa Transcentral Highway sa Barangay Busay, dakbayan sa Sugbo tungod sa sunodsunod nga disgrasya sa mga motorista.

Si Cyril Velasco, tag-iya sa Garnet Driving School, nagkanayon nga ila kining gipahaom sa pag-obserbar sa Kalagkalag aron maedukar ang motorcycle riders ug mag-amping.

Sa nakuha niya nga data, ang dakbayan dunay 1,600 ka aksidente gikan sa Enero hangtod sa Mayo ning tuiga nga maka paalarma na.

Gumikan niini, mihimo na usab siyag laing proyekto nga mao ang pagbutang og karatola nga gihulma og lapida aron mabasahan sa mga motorista.

Matod ni Velasco, nadisgrasya usab siya niadto nga niresulta sa pagkabali sa iyang tuong bukton ug pagkamatay sa nakabangga kaniya.

“Sa Cebu City lang, sir, January to May 2021 1,600 plus ang aksidente, unya hunahunaon nato Covid pa meaning, restricted pa kaayo ang movement pero daghan pa gihapon kaayo ang na aksidente, very alarming,” dugang ni Cyril Velasco, kinsa kaugalingong pundo ang gigasto sa lapida.

Dili lalim alang niya nga makabalita nga adunay riders ang nakalas tungod sa disgrasya sa kadalanan.

Ang pagbutang sa lapida gikalipay ni Busay Barangay Kapitan Maria Christia Famador ug sa konseho human sa maong lugar lang, 30 na ang disgrasya sa motorsiklo sukad sa milabayng tuig ug unom ang nangamatay.

Kadaghanan sa mga nadisgrasya dili taga Busay ug naka inom usab.

Ang Highway Patrol Group (HPG) 7 pinaagi ni Police Major Sylvestre Cenia, Jr. mihangop sa gihimo ni Velasco.

Dugang niya nga haom kini karon ilabi na nga nagsingabot ang Kalagkalag ug daghang riders ang manaka sa Transcentral Highway aron maglingawlingaw.

Awhag sa HPG 7 sa mga motorista nga hunahunaon ang pagmaneho nga luwas ug kompleto sa panagang sa ilang lawas sama sa helmet ug uban pa. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph