USA ka Sugboanon nga tua na nanimuyo sa Saskatchewan, Canada nakadawat og pasidungog nga 1st Filipino Heroes Award, usa ka proyekto sa Filipino Ethnic Community of the Family Federation for World Peace and Unification, USA.
Si Joseph Buddy Amodia Jr., usa ka chef, gipasidunggan tungod sa iyang community service alang sa mga kabus pinaagi sa tabang pinansyal ug wheelchair donations.
Giila usab ang iyang pagka matinud-anon tungod sa iyang pag-uli sa usa ka purse nga iyang nakit-an nga adunay sulod nga mahalon nga butang.
Ang award gitumong aron pasidunggan ang mga first responder ug health workers nga nagsakripisyo sa ilang kinabuhi ug kaluwasan karong panahon sa pandemya.
Gitumong usab kini aron ipakita ug pasidunggan ang mga nahimo sa mga Filipino alang sa kaugmaran sa America ug Canada.
Si Amodia ang bugtong individual awardee gikan sa Canada.
Ang maong organisasyon mihatag usab og pasidungog sa organizations ug foundations.
Sa wala pa siya mo-migrate ngadto sa Canada, si Amodia nagtrabaho sa pipila ka inilang resorts sa Sugbo.
Karon sa Canada, siya nagtrabaho isip culinary chef instructor sa Indiana Aerospace University ug isip line cook sa Fox and Hounds Pub & Brewery.
Nag-host usab siya sa usa ka cooking segment sa FTV Channel nga Around Saskatchewan diin gipasundayag usab sa tibuok Canada.
“Food is one thing that can bring people together especially in this time of pandemic,” matod niya.(REV gikan sa PR)